Delhi-NCR Weather Update: دہلی- این سی آر میں  بدلا موسم کا مزاج، کئی علاقوں میں تیز بارش، امس  بھری گرمی سے ملی راحت

دہلی-این سی آر میں موسم کا مزاج بدلا ہوا ہے۔ صبح سے آسمان پر گہرے بادل چھائے ہوئے ہیں۔ وہیں منگل کے روز امس نے دہلی والوں کو خوب پریشان کیا، لیکن آج محکمہ موسمیات نے ہلکی راحت کی امید ظاہر کی ہے۔ آئی ایم ڈی (محکمہ موسمیات) کا کہنا ہے کہ آج دارالحکومت کے کئی علاقوں میں ہلکی سے درمیانی بارش ہونے کے امکانات ہیں۔

ملک کی دارالحکومت دہلی اور این سی آر میں ان دنوں موسم مسلسل بدلتا نظر آ رہا ہے۔ کبھی تیز دھوپ تو کبھی ہلکی پھوار کی صورتحال بنی ہوئی ہے۔ منگل کے روز محکمہ موسمیات نے دہلی میں بارش کی پیش گوئی کی تھی، لیکن بارش نہیں ہوئی۔ البتہ پورا دن بادلوں اور دھوپ کے درمیان آنکھ مچولی جاری رہی۔ لیکن آج محکمہ موسمیات نے بارش کے حوالے سے الرٹ جاری کیا ہے۔

مانسون کا موڈ اب بھی آن اینڈ آف
دہلی میں اگرچہ مانسون جون کے آخر میں پہنچ گیا تھا، لیکن اس کا مزاج اب تک طے نہیں ہو پایا۔ کبھی زور دار بارش سے سڑکیں پانی میں ڈوب جاتی ہیں، تو کبھی کئی دن تک بالکل خشک موسم رہتا ہے۔ اس بار کا مانسون “ٹچ اینڈ گو” موڈ میں دکھائی دے رہا ہے۔ ماہرین موسمیات کے مطابق 6 سے 8 اگست کے دوران ہلکی سے درمیانی بارش کا سلسلہ جاری رہ سکتا ہے۔ اگرچہ فی الحال شدید بارش کا کوئی امکان نہیں ہے، لیکن گرج چمک اور تیز ہواؤں (30 سے 40 کلومیٹر فی گھنٹہ) کے ساتھ ہلکی بارش ضرور دیکھی جا سکتی ہے۔

آنے والے چند دنوں کا موسم کیسا رہے گا
آج یعنی 6 اگست کی بات کریں، تو دارالحکومت اور این سی آر کے کچھ حصوں میں آسمان جزوی طور پر ابر آلود رہے گا۔ کچھ علاقوں میں بہت ہلکی بارش یا گرج چمک کے ساتھ بوندا باندی ہو سکتی ہے۔ 7 سے 9 اگست تک بھی موسم تقریباً اسی پیٹرن پر چلے گا — جزوی بادل، ہلکی بارش کی امید، اور کبھی کبھار گرج چمک کے ساتھ ہوائیں۔

امس اور گرمی سے کافی دنوں سے پریشان دہلی والوں کے لیے یہ ایک خوشخبری ہے۔ اگر بادل مہربان رہے، تو آنے والے دنوں میں صبح و شام کی سیر کچھ آسان ہو سکتی ہے۔ درجہ حرارت میں معمولی کمی کا بھی امکان ظاہر کیا جا رہا ہے، جس سے تھوڑی ٹھنڈک محسوس ہو سکتی ہے۔

بھارت ایکسپریس اردو