اتراکھنڈ کے وزیر اعلیٰ پشکر سنگھ دھامی۔ (فائل فوٹو)
اتراکھنڈ کابینہ نے بدھ کے روز وزیر اعلیٰ پشکر سنگھ دھامی کی صدارت میں منعقدہ اجلاس میں ’’اتراکھنڈ فریڈم آف ریلیجن (ترمیمی) بل 2025‘‘ کو منظوری دے دی ہے۔ ریاستی حکومت کی طرف سے جاری کردہ بیان کے مطابق اس قانون میں غیر قانونی مذہبی تبدیلی پر سخت سزائیں، ڈیجیٹل میڈیا کے ذریعے تبدیلی مذہب کے پرچار پر پابندی اور متاثرین کے تحفظ جیسے اہم نکات شامل ہیں۔
اتراکھنڈ کے وزیر اعلیٰ کے دفتر (CMO) کی جانب سے جاری بیان کے مطابق بل میں لالچ یا دھوکہ دہی کے ذریعے مذہب تبدیل کروانے کو وسیع پیمانے پر جرم قرار دیا گیا ہے۔ اس میں مذہبی تبدیلی کے لیے تحفے، نقدی یا سامان، ملازمت، مفت تعلیم یا شادی کا وعدہ، مذہبی جذبات کو ٹھیس پہنچانا یا کسی دوسرے مذہب کی بڑائی کرنا، ان سب کو جرم کے زمرے میں شامل کیا گیا ہے۔
عمر قید کی سزا بھی دی جا سکتی ہے
اس بل کے مطابق سوشل میڈیا، میسیجنگ ایپس یا کسی بھی آن لائن پلیٹ فارم کے ذریعے تبدیلی مذہب کے لیے پرچار یا اکسانا بھی ممنوع قرار دیا گیا ہے۔ اس بل میں عام خلاف ورزی پر 3 سے 10 سال قید، حساس طبقوں سے متعلق معاملات میں 5 سے 14 سال قید اور سنگین معاملات میں 20 سال سے عمر قید تک کی سزائیں اور بھاری جرمانے تجویز کیے گئے ہیں۔ اس کے تحت مذہب چھپا کر شادی کرنے والوں کو بھی سخت سزا دی جائے گی۔ وہیں غیرقانونی مذہبی تبدیلی کے متاثرین کے لیے تحفظ، بازآبادکاری، علاج، سفر اور روزمرہ اخراجات کی سہولت فراہم کرنے کی شقیں بھی بل کا حصہ ہیں۔ ریاستی حکومت کا کہنا ہے کہ یہ قانون شہریوں کے مذہبی حقوق کی حفاظت، لالچ، دھوکہ یا دباؤ کے ذریعے کی جانے والی تبدیلی مذہب کو روکنے اور سماجی ہم آہنگی کو برقرار رکھنے کے لیے ضروری ہے۔
اس کے ساتھ ہی اتراکھنڈ حکومت نے یکساں سول کوڈ (UCC) قوانین کے تحت شادی کی رجسٹریشن فیس ₹250 میں چھوٹ کی مدت کو 26 جنوری 2026 تک بڑھا دیا ہے۔ ریاستی محکمہ داخلہ کی طرف سے جاری نوٹیفکیشن کے مطابق وہ شہری جن کی شادی UCC کے نفاذ سے قبل ہو چکی ہے یا جنھیں طلاق یا شادی کے خاتمے کا عدالتی حکم حاصل ہو چکا ہے اور جن کی شادی اب تک رجسٹرڈ نہیں ہے وہ اب اس مقررہ مدت تک رجسٹریشن کروا کر فیس میں چھوٹ حاصل کر سکتے ہیں۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
