Union budget 2026: ملک میں تین آیوروید انسٹی ٹیوٹ اور 5 یونیورسٹی ٹاؤن شپ ہوں گے ڈیولپ، جانیے بجٹ میں تعلیم کے شعبے کو کیا ملا؟

مرکزی وزیر خزانہ نرملا سیتارمن نے یکم فروری 2026 کو مسلسل نویں بار مکمل بجٹ پیش کیا ہے۔ اس بجٹ میں حکومت نے تعلیم کے شعبے کو مضبوط کرنے کے لیے کئی اہم اعلانات کیے ہیں۔ خاص طور پر آیوروید، فارما، ڈیزائن، تکنیکی تعلیم اور طلبہ کی سہولیات پر حکومت نے زور دیا ہے۔ بجٹ 2026 سے یہ واضح اشارہ ملتا ہے کہ آنے والے برسوں میں تعلیم کو روزگار اور ترقی سے براہِ راست جوڑنے کی تیاری کی جا رہی ہے۔

آیوروید تعلیم کو فروغ دینے کا اعلان

آیوروید تعلیم کو فروغ دینے کے لیے حکومت نے اعلان کیا ہے کہ ملک میں تین نئے آیوروید انسٹیٹیوٹ قائم کیے جائیں گے۔ ادویات کے معیار کی جانچ کے لیے ڈروگ ٹیسٹنگ لیبز کو بہتر بنایا جائے گا۔ حکومت کا ماننا ہے کہ آیوروید نہ صرف بھارت کی روایتی طب ہے بلکہ یہ روزگار اور تحقیق کے نئے مواقع بھی پیدا کر سکتی ہے۔ اس کے ساتھ ساتھ تین نئے آیوروید کالج بھی کھولنے کا اعلان کیا گیا ہے، جس سے آیوروید کی تعلیم حاصل کرنے والے طلبہ کو بہتر سہولیات ملیں گی اور اس شعبے میں تربیت یافتہ ڈاکٹرز کی تعداد بڑھے گی۔

پانچ یونیورسٹی ٹاؤن شپ تیار کی جائیں گی

بجٹ 2026 میں ایک بڑا اعلان یہ بھی ہے کہ ملک میں پانچ یونیورسٹی ٹاؤن شپ تیار کی جائیں گی۔ ان ٹاؤن شپ میں تعلیم، تحقیق، ہاسٹل، کھیل اور اسٹارٹ اپ کی سہولیات ایک ہی جگہ دستیاب ہوں گی۔ حکومت کا مقصد طلبہ کو ایسا ماحول فراہم کرنا ہے جہاں وہ پڑھائی کے ساتھ ساتھ نئے خیالات اور اختراعات پر بھی کام کر سکیں۔ اس کے علاوہ، ملک میں پانچ نئے یونیورسٹیاں کھولنے کا بھی اعلان کیا گیا ہے، جس سے اعلیٰ تعلیم تک رسائی آسان ہوگی اور مختلف ریاستوں میں نئے تعلیمی مواقع پیدا ہوں گے۔

فارما سیکٹر کے لیے بھی بجٹ میں خاص جگہ

فارما سیکٹر کے لیے بھی بجٹ میں خاص جگہ رکھی گئی ہے۔ اعلان کے مطابق تین نئے فارماسوٹیکل تعلیم ادارے قائم کیے جائیں گے، جہاں ادویات کی تیاری، تحقیق اور معیار پر خاص توجہ دی جائے گی، جس سے بھارت کو فارما سیکٹر میں مزید مضبوط بنانے میں مدد ملے گی۔

ڈیزائن اور تخلیقی تعلیم کو فروغ

ڈیزائن اور تخلیقی تعلیم کو فروغ دینے کے لیے حکومت نے مشرقی بھارت میں نیا انڈین انسٹیٹیوٹ آف ڈیزائن (IIND) کھولنے کا اعلان کیا ہے۔ اس سے اس شعبے کے طلبہ کو ملک کے دوسرے حصوں میں جانے کی ضرورت نہیں پڑے گی اور مقامی سطح پر ہی بہتر تعلیم حاصل ہوگی۔

ڈیجیٹل اور تخلیقی اسکل بڑھانے کا منصوبہ

ڈیجیٹل اور تخلیقی مہارتیں بڑھانے کے لیے حکومت نے ABGC Content Creator Lab شروع کرنے کا منصوبہ بنایا ہے۔ اس منصوبے کے تحت IIT ممبئی کی مدد سے ملک کے 15,000 اسکولوں اور 500 کالجوں میں ایسی لیبز قائم کی جائیں گی۔ ان لیبز میں طلبہ ڈیجیٹل مواد، گیمنگ، اینی میشن اور جدید ٹیکنالوجی سے متعلق اسکل سیکھ سکیں گے۔ وزیر خزانہ نے اعلیٰ تعلیم کے اداروں میں ہر ضلع میں لڑکیوں کے لیے ہاسٹل بنانے کا بھی اعلان کیا ہے۔

بھارت ایکسپریس اردو۔