کاٹھمنڈو (نیپال): بدھ کی دوپہر ترکش ایئرلائنز کے ایک مسافر طیارے کے دائیں انجن میں اڑان کے فوراً بعد آگ لگ گئی، جس کے باعث کاٹھمنڈو کے تری بھون انٹرنیشنل ایئرپورٹ پر ایمرجنسی نافذ کر دی گئی۔ یہ طیارہ کاٹھمنڈو سے استنبول جا رہا تھا۔ ایئرپورٹ حکام کے مطابق، ٹیک آف کے صرف چار منٹ بعد دائیں انجن میں آگ بھڑک اٹھی۔
انجن بند کر کے طیارے کو فضا میں روکے رکھا گیا
تری بھون انٹرنیشنل ایئرپورٹ کے جنرل منیجر ٹیکناتھ سیتولا نے بتایا کہ ’’ترکش ایئرلائن کی پرواز نمبر THY-727 نے دوپہر 1:28 بجے مقامی وقت کے مطابق اڑان بھری تھی، اور صرف چار منٹ بعد دائیں انجن میں آگ لگ گئی۔ پائلٹس نے فوری طور پر طیارے کو کاٹھمنڈو کے مغرب کی جانب موڑا، دائیں انجن کو بند کیا اور تقریباً 10 منٹ تک طیارے کو فضا میں روکے رکھا۔‘‘
236 افراد سوار، سب محفوظ
حکام کے مطابق ایئر بس A330-303 سیریز کے اس وائڈ باڈی طیارے میں 225 مسافر سوار تھے، جبکہ 11 افراد پر مشتمل عملہ بھی موجود تھا، اس طرح کل 236 افراد طیارے میں سوار تھے۔ تمام مسافر اور عملے کے افراد محفوظ ہیں۔
کولکاتا میں ایمرجنسی لینڈنگ
واقعے کے فوراً بعد کاٹھمنڈو ایئرپورٹ کو تقریباً 15 منٹ کے لیے بند کر دیا گیا۔ بعد ازاں طیارے کو کولکاتا کے نیتاجی سبھاش چندر بوس انٹرنیشنل ایئرپورٹ کی جانب موڑ دیا گیا، جہاں فل ایمرجنسی لینڈنگ کرائی گئی۔ کولکاتا ایئرپورٹ کے ڈائریکٹر کے مطابق ’’کپتان نے کولکاتا ایئر ٹریفک کنٹرول کو دائیں انجن میں ممکنہ آگ کی اطلاع دی تھی۔ طیارہ 2:49 بجے دوپہر کولکاتا ایئرپورٹ پر بحفاظت اترا، جس میں 236 افراد سوار تھے۔‘‘ طیارہ اس وقت کولکاتا ایئرپورٹ پر موجود ہے اور تکنیکی جانچ جاری ہے۔ حکام نے کہا ہے کہ مکمل معائنہ کے بعد ہی اگلی کارروائی طے کی جائے گی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
