Pune LPG Blast: پونے میں گیس سلنڈر پھٹنے سے ایک ہی خاندان کے تین افراد جاں بحق، گیس لیکیج کے باعث زوردار دھماکہ

نئی دہلی: مہاراشٹر کے شہر پونے کے کھانڈوے نگر علاقے میں ایل پی جی گیس سلنڈر سے گیس کے اخراج کے باعث ہونے والے زوردار دھماکے نے ایک ہی خاندان کے تین افراد کی جان لے لی۔ افسوسناک واقعے میں شدید جھلسنے والے خاندان کے تمام افراد دورانِ علاج دم توڑ گئے، جب کہ دھماکے سے فلیٹ کو بھی بھاری نقصان پہنچا۔ فائربریگیڈ حکام کے مطابق جمعہ کی صبح تقریباً 9 بج کر 15 منٹ پر کھانڈوے نگر میں واقع ایک رہائشی عمارت میں آگ لگنے اور سلنڈر دھماکے کی اطلاع موصول ہوئی۔ اطلاع ملتے ہی کھراڑی، دھانوری اور یروڈا فائر اسٹیشنوں سے تین فائر ٹینڈرز موقع پر روانہ کیے گئے اور آگ بجھانے کی کارروائی شروع کی گئی۔ جب امدادی ٹیمیں موقع پر پہنچیں تو گراؤنڈ پلس ون منزلہ عمارت کی پہلی منزل پر واقع فلیٹ میں شدید آگ لگی ہوئی تھی۔ فائر فائٹرز نے فوری کارروائی کرتے ہوئے پانی کا چھڑکاؤ کیا اور آگ پر قابو پایا، جس کے بعد زخمی افراد کو اسپتال منتقل کیا گیا۔

حادثے میں 60 سالہ وشنو گیتے، ان کی 50 سالہ اہلیہ روندیونیکا گیتے اور 35 سالہ پانڈورنگ گیتے بری طرح جھلس گئے تھے۔ پانڈورنگ گیتے نے شدید جھلسنے کے باعث ابتدائی طور پر ہی دم توڑ دیا تھا، جبکہ ان کے والدین کو تشویشناک حالت میں اسپتال میں داخل کرایا گیا تھا۔ قابل ذکر بات یہ ہےکہ  بعد میں علاج کے دوران وشنو گیتے اور روندیونیکا گیتے بھی زندگی کی بازی ہار گئے، جس کے بعد اس سانحے میں ہلاک ہونے والوں کی تعداد تین ہو گئی۔ابتدائی تحقیقات میں معلوم ہوا ہے کہ گھر میں استعمال ہونے والا پرانا ایل پی جی سلنڈر ختم ہونے کے بعد نیا سلنڈر لگایا جا رہا تھا۔ اسی دوران گیس کا اخراج شروع ہو گیا، جو پورے گھر میں پھیل گئی۔ بعد ازاں کسی چنگاری یا آگ کے منبع کے باعث زوردار دھماکا ہوا اور پورے فلیٹ میں آگ بھڑک اٹھی۔حکام کے مطابق دھماکا اتنا شدید تھا کہ فلیٹ کا ہال مکمل طور پر جل کر تباہ ہو گیا۔

گھر میں موجود فرنیچر، ٹی وی، برقی تاریں اور دیگر قیمتی سامان خاکستر ہو گیا۔ باتھ روم اور ٹوائلٹ کے دروازے، گیزر اور دیگر تنصیبات بھی آگ کی زد میں آ کر تباہ ہو گئیں، جب کہ باورچی خانے میں رکھا فریج اور گھریلو سامان بھی شدید متاثر ہوا۔آگ اور دھویں کے باعث فلیٹ کی تمام دیواریں سیاہ پڑ گئی ہیں۔ تاہم فائر بریگیڈ کی بروقت کارروائی کے نتیجے میں آگ کو عمارت کے دیگر فلیٹس تک پھیلنے سے روک لیا گیا، جس سے مزید جانی اور مالی نقصان سے بچاؤ ممکن ہو سکا۔پولیس اور فائر بریگیڈ حکام نے واقعے کی تفصیلی تحقیقات شروع کر دی ہیں۔ ماہرین کا کہنا ہے کہ گیس سلنڈر تبدیل کرتے وقت احتیاطی تدابیر اختیار کرنا انتہائی ضروری ہے، کیونکہ معمولی لاپروائی بھی بڑے حادثات کا سبب بن سکتی ہے۔ یہ سانحہ ایک بار پھر گھریلو گیس کے محفوظ استعمال کی اہمیت کو اجاگر کرتا ہے۔

بھارت ایکسپریس اردو