Resignation continues in JDU: نتیش کمار کو جھٹکے پر جھٹکا،اب تک 6 لیڈران نے پارٹی سے دیا استعفیٰ، غلام رسول بلیاوی بھی قطار میں،لے سکتے ہیں فیصلہ

جے ڈی یو سے وابستہ مسلم لیڈران وزیر اعلیٰ نتیش کمار کی پارٹی کو جھٹکا دے رہے ہیں۔ لوک سبھا کے بعد وقف ترمیمی بل راجیہ سبھا سے بھی پاس ہو چکا ہے۔ ادھر جے ڈی یو میں استعفے کا سلسلہ  شروع ہوگیا ہے۔ وزیر اعلیٰ نتیش کمار کو لگتا ہے کہ انہیں کمزور کرنے کی کوشش کی جا رہی ہے۔ اگرچہ استعفیٰ دینے والے چھوٹے درجے کے لیڈر ہیں لیکن وہ پارٹی میں کسی نہ کسی عہدے سے وابستہ تھے۔ اب جے ڈی یو کے اقلیتی محکمہ کے ریاستی جنرل سکریٹری محمد تبریز صدیقی نے پارٹی سے استعفیٰ دے دیا ہے۔

محمد تبریز صدیقی علی گڑھ نے پارٹی کی بنیادی رکنیت اور دیگر ذمہ داریوں سے استعفیٰ دے دیا ہے۔ انہوں نے اپنا استعفیٰ سی ایم نتیش کمار کو لکھا ہے۔ خط میں لکھا ہےکہ آپ کی (نتیش) پارٹی کی وقف ترمیمی بل کی حمایت نے میرے اعتماد کو گہرا نقصان پہنچایا ہے۔ خط کی ایک کاپی جے ڈی یو کے ریاستی صدر امیش کشواہا کو بھی بھیجی گئی ہے۔ اپنے استعفیٰ نامہ میں محمد تبریز صدیقی علی گڑھ نے خود کو جے ڈی یو کا وفادار کارکن بتایا ہے۔ انہوں نے کہا کہ انہیں کبھی امید نہیں تھی کہ جے ڈی یو اس (وقف ترمیمی بل) بل کی حمایت کرے گی۔ دعویٰ کیا کہ اس کا اثر آنے والے بہار اسمبلی انتخابات 2025 میں واضح طور پر نظر آئے گا۔مستقبل میں جے ڈی یو میں بھگدڑ کی بات بھی کی ہے۔

تبریز صدیقی علی گڑھ نے اپنے استعفیٰ میں لکھا ہے کہ “اس طرح کا فیصلہ مسلم کمیونٹی کے خلاف لیا گیا جنہوں نے گزشتہ 19 سالوں سے پارٹی کو سپورٹ کیا، یہ اقدام ان لاکھوں حامیوں کے بھروسے کے ساتھ دھوکہ ہے جو آپ کو بار بار وزیر اعلیٰ کے عہدے تک لے کر آئے۔ اس صورت حال میں میرا ضمیر مجھے جنتا دل یونائیٹڈ میں رہنے کی اجازت نہیں دیتا ہے۔ اس لیے میں پارٹی کے پرائمری ممبر شپ سے استعفیٰ دے رہا ہوں۔آپ کو بتادیں کہ اس سے قبل گزشتہ جمعرات (03 اپریل 2025) کو محمد قاسم انصاری اور محمد شاہنواز ملک نے استعفیٰ دے دیا تھا۔ اب تک محمد تبریز صدیقی علی گڑھ سمیت چھ لیڈر پارٹی چھوڑ چکے ہیں۔مانا یہ بھی جارہا ہے کہ پارٹی کے قومی جنرل سکریٹری غلام رسول بلیاوی بھی پارٹی چھوڑ سکتے ہیں چونکہ انہوں نے بغاوت کا سر بلند کردیا ہے۔

بھارت ایکسپریس۔