مرکزی وزیر داخلہ امت شاہ نے تمل ناڈو میں جمعہ کو کہا کہ مہاراشٹر کے گورنر سی پی رادھا کرشنن کو این ڈی اے کی جانب سے نائب صدر کے عہدے کے لیے امیدوار نامزد کرنا تمل ناڈو کے لیے فخر کی بات ہے۔ انھوں نے کہا کہ یہ وزیراعظم نریندر مودی کی جانب سے تمل زبان، ثقافت اور قیادت کے احترام کا مظہر ہے۔ بی جے پی کے بوتھ کارکنوں کے اجتماع سے خطاب کرتے ہوئے امت شاہ نے کہا کہ ’’میں تمل میں بات نہ کر سکنے پر معذرت خواہ ہوں۔ میں تمل ناڈو کے عوام کو بتانے آیا ہوں کہ سی پی رادھا کرشنن نائب صدر بننے جا رہے ہیں اور راجیہ سبھا کے چیئرمین کا عہدہ سنبھالیں گے۔ اسی طرح پہلے اے پی جے عبدالکلام جی کو صدر بنا کر این ڈی اے نے تمل ناڈو کو فخر بخشا تھا۔‘‘
واضح رہے کہ سی پی رادھا کرشنن نے بدھ کو وزیراعظم مودی کی موجودگی میں نائب صدر کے انتخابات کے لیے نامزدگی داخل کی۔ وہ تمل ناڈو کے تروپور میں 20 اکتوبر 1957 کو پیدا ہوئے۔ وہ دو مرتبہ کوئمبٹور سے رکن پارلیمان رہ چکے ہیں۔ وہ جن سنگھ اور بعد ازاں بی جے پی کے پرانے اور سرگرم لیڈر رہے ہیں۔
امت شاہ نے اپنی تقریر میں 130ویں ترمیمی بل 2025 کا بھی بھرپور دفاع کیا، جس کے تحت اگر کوئی وزیراعلیٰ یا وزیراعظم جیل جاتا ہے تو اسے عہدے سے استعفیٰ دینا ہوگا۔ امت شاہ نے کہا کہ ’’ڈی ایم کے کے کئی وزرا جیسے کے پونموڈی اور سنتھل بالا جی آٹھ آٹھ مہینے جیل میں رہے مگر استعفیٰ نہیں دیا۔ کیا کوئی جیل سے حکومت چلا سکتا ہے؟‘‘ انھوں نے ڈی ایم کے کو نشانہ بناتے ہوئے مزید کہا کہ ’’یہ لوگ اس بل کو کالا قانون کہتے ہیں، لیکن اسٹالن جی، آپ کو یہ کہنے کا حق نہیں کیوں کہ آپ خود کالا کرتوت کرتے ہیں۔‘‘
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
