رائے پور: وزیر اعظم نریندر مودی نے ہفتے کے روز چھتیس گڑھ کے نوا رائے پور واقع شری ستیا سائی سنجیونی اسپتال میں منعقد ایک خصوصی تقریب میں شرکت کی، جہاں انہوں نے دل کے امراض سے صحت یاب ہونے والے بچوں سے ملاقات کی۔ یہ ملاقات ’دل کی بات‘ پروگرام کے تحت ہوئی، جس میں مودی کا بچوں کے ساتھ بے ساختہ پیار اور اپنائیت بھرپور انداز میں نظر آئی۔ وزیر اعظم مودی نے اسپتال پہنچنے کے بعد بھگوان شری ستیا سائی بابا کی مورتی پر گلہائے عقیدت پیش کیے۔ اس کے بعد انہوں نے اُن بچوں کو اسناد تقسیم کیں جن کا علاج کامیابی سے مکمل ہوا تھا۔ اسپتال انتظامیہ کے مطابق اب تک تقریباً 2500 بچوں کے دل کے آپریشن کامیابی سے انجام دیے جا چکے ہیں۔
تقریب کے دوران بچے وزیر اعظم سے ملاقات کے لیے بے حد پُرجوش نظر آئے، جبکہ مودی نے بھی ان سے شفقت بھرے انداز میں بات چیت کی۔ بچوں سے بات کرتے ہوئے ان کے چہرے پر مسکراہٹ نمایاں تھی اور پورا ماحول جذباتی اور خوشگوار بن گیا۔ اسی روز وزیر اعظم نے نوا رائے پور میں برہما کماری کے ’شانتی شِکھر‘ مرکز کا افتتاح کیا، جو روحانیت، تعلیم، مراقبہ اور داخلی سکون کا ایک جدید ادارہ ہے۔ افتتاحی تقریب میں خطاب کرتے ہوئے مودی نے کہا کہ یہ دن چھتیس گڑھ سمیت پورے ملک کے لیے خاص اہمیت رکھتا ہے، کیونکہ آج ریاست اپنی قیام کے 25 سال مکمل کر رہی ہے۔ انہوں نے جھارکھنڈ اور اتراکھنڈ کے قیام کی پچیسویں سالگرہ پر بھی عوام کو مبارکباد دی۔
وزیر اعظم نے کہا کہ ”ریاستوں کی ترقی ہی ملک کی ترقی کا راستہ ہے۔ ہم سب ’وِکست بھارت‘ کے ہدف کے لیے مل کر آگے بڑھ رہے ہیں۔ برہما کماری جیسی تنظیمیں اس مشن کو روحانی طاقت فراہم کر رہی ہیں“۔
مودی نے برہما کماری تحریک کے ساتھ اپنے طویل تعلق کا ذکر کرتے ہوئے کہا کہ انہوں نے اس ادارے کو ایک برگد کے درخت کی طرح پھیلتے ہوئے دیکھا ہے۔ انہوں نے بتایا کہ 2011 میں احمد آباد کے ’فیوچر آف پاور‘ پروگرام، 2012 میں تنظیم کے 75 سال مکمل ہونے کی تقریب اور 2013 میں پریاگ راج کے اجلاس سمیت متعدد مواقع پر ان کی شرکت اس تحریک سے گہرے رشتے کی علامت رہی ہے۔ آخر میں وزیر اعظم نے کہا کہ آزادی کا امرت مہوتسو ہو یا صفائی مہم، برہما کماری کی خدمات ہمیشہ خلوص، نظم و ضبط اور انسانیت کی خدمت کا مظہر رہی ہیں۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
