یوپی میں پوسٹر کی سیاست
لکھنؤ: اتر پردیش کے وزیر اعلیٰ یوگی آدتیہ ناتھ کے بیان ’بٹیں گے تو کٹیں گے‘ کو لے کر حکمراں جماعت اور اپوزیشن کے درمیان مسلسل پوسٹر وار جاری ہے۔ ہفتہ کو ایس پی آفس کے باہر ایک اور پوسٹر لگایا گیا جس میں لکھا تھا کہ ’’تم بٹنے کٹنے کا راگ لکھو، ہم تاریخ کا حساب لکھیں گے۔‘‘
ایس پی آفس کے باہر ایک اور پوسٹر لگایا گیا ہے جسے ایس پی لیڈر محمد اخلاق نے لگوایا ہے۔ اس میں انہوں نے سلوگن کے ذریعے حکمران جماعت کو گھیرنے کی کوشش کی ہے۔ تم بٹنے کٹنے کا راگ لکھو، ہم تاریخ کا حساب لکھیں گے۔ تم نفرت کا یوگ لکھو، ہم ترقی کا سنیوگ لکھیں گے۔ تم زمین پر ظلم لکھو۔ ہم آسمان میں پی ڈی اے کا انقلاب لکھیں گے۔
پوسٹر میں مہنگائی اور امن و امان سے متعلق چھوٹی چھوٹی تصاویر بھی دکھائی گئی ہیں۔ تصویر میں ایس پی سربراہ اکھلیش یادو کے ساتھ شیو پال اور آدتیہ یادو کی بھی تصویر لگائی گئی ہے۔
واضح رہے کہ اس سے پہلے جمعہ کے روز وارانسی میں ایس پی کی جانب سے ایک پوسٹر لگایا گیا تھا جس میں ریزولوشن 2024 اور ٹارگٹ 2027 لکھتے ہوئے اکھلیش یادو کو شری کرشنا اور راہل گاندھی کو ارجن کے کردار میں پیش کیا گیا تھا۔ اس سے پہلے گورکھپور میں بی جے پی کی طرف سے ’بٹیں گے تو کٹیں گے‘ کے پوسٹر لگائے گئے تھے۔ اس کے بدلے میں ایس پی کے ’جڑیں گے تو بڑھیں گے‘ کے پوسٹر بھی کافی چرچا میں رہے۔
بتا دیں کہ اتر پردیش کی نو اسمبلی سیٹوں پر ہونے والے ضمنی انتخابات کے لیے 20 نومبر کو ووٹنگ ہونی ہے۔ نتائج کا اعلان 23 نومبر کو کیا جائے گا۔ یہ پوسٹر ضمنی انتخابات اور 2027 کے اسمبلی انتخابات کے حوالے سے دیکھا جا رہا ہے۔
بھارت ایکسپریس۔
