نئی دہلی : یوم عاشورہ کے موقع پر وزیراعظم نریندر مودی نے حضرت امام حسینؑ کی شہادت کو خراج عقیدت پیش کرتے ہوئے کہا ہے کہ ان کی قربانی آج بھی دنیا بھر کے انسانوں کو حق، انصاف اور سچائی کے راستے پر ثابت قدم رہنے کی ترغیب دیتی ہے۔ وزیراعظم نے سوشل میڈیا پلیٹ فارم ایکس پر اپنے پیغام میں لکھا کہ حضرت امام حسینؑ کی بے مثال قربانی ہمت، صبر اور غیر متزلزل ایمان کی ایسی مثال ہے جو ہر دور میں ظلم و ناانصافی کے خلاف کھڑے ہونے کا حوصلہ بخشتی رہے گی۔محرم الحرام کا چاند نظر آتے ہی دنیا بھر میں مسلمان غم و اندوہ کی کیفیت میں مبتلا ہو جاتے ہیں۔ اس مقدس مہینے میں حضرت امام حسینؑ اور ان کے جاں نثار ساتھیوں کی شہادت کو یاد کیا جاتا ہے، جنہوں نے کربلا کے تپتے ہوئے میدان میں حق و صداقت کی خاطر اپنی جانیں قربان کر دیں۔ اسی نسبت سے مجالس، جلوس اور عزاداری کا اہتمام کیا جاتا ہے اور اہلِ بیتؑ کی قربانیوں کو عقیدت کے ساتھ یاد کیا جاتا ہے۔
The sacrifice of Hazrat Imam Hussain (AS) continues to inspire many people to remain steadfast in the pursuit of truth and justice. It is also a reminder of the enduring power of courage and conviction.
— Narendra Modi (@narendramodi) June 26, 2026
تاریخی روایات کے مطابق یہ واقعہ 61 ہجری کا ہے جب یزید بن معاویہ نے حضرت امام حسینؑ سے بیعت کا مطالبہ کیا۔ حضرت امام حسینؑ نے ظلم، جبر اور باطل کے سامنے سر جھکانے سے انکار کرتے ہوئے واضح کیا کہ وہ کسی ایسے حکمران کی اطاعت قبول نہیں کرسکتے جو اسلامی تعلیمات کے برخلاف طرزِ عمل اختیار کرے۔ انہوں نے حق اور انصاف کی سربلندی کو اپنی جان سے زیادہ اہم سمجھا۔ دو محرم کو حضرت امام حسینؑ اپنے اہل خانہ اور صرف 72 وفادار ساتھیوں کے ساتھ کربلا پہنچے، جبکہ دوسری جانب مخالف فوج کی بہت بڑی تعداد موجود تھی۔ سات محرم کو اہلِ بیت پر دریائے فرات کا پانی بند کر دیا گیا، جس کے باعث خواتین اور بچوں سمیت پورا قافلہ شدید پیاس کا شکار ہو گیا۔ چھ ماہ کے حضرت علی اصغر اور کم سن حضرت سکینہؑ کی پیاس تاریخ کا انتہائی دردناک باب سمجھی جاتی ہے، مگر ان تمام مصائب کے باوجود حضرت امام حسینؑ نے باطل کے سامنے جھکنے سے انکار کر دیا۔
دس محرم، یومِ عاشورہ کو حضرت امام حسینؑ کے ساتھی یکے بعد دیگرے میدانِ کربلا میں شہید ہوتے گئے۔ حضرت عباسؑ، حضرت علی اکبرؑ، حضرت قاسمؑ سمیت تمام جاں نثاروں نے حق کی خاطر جانیں نچھاور کر دیں۔ آخر میں حضرت امام حسینؑ نے بھی جامِ شہادت نوش کیا، لیکن ظلم کے سامنے سر تسلیم خم نہ کیا۔ وزیرِ اعظم مودی نے اپنے پیغام میں کہا کہ حضرت امام حسینؑ کی شہادت صرف مسلمانوں ہی نہیں بلکہ پوری انسانیت کے لیے حق، انصاف، صبر، قربانی اور ظلم کے خلاف ڈٹ جانے کا ابدی پیغام ہے، جو آنے والی نسلوں کو ہمیشہ راہِ حق پر قائم رہنے کی ترغیب دیتا رہے گا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
