PM Modi Receives Call from Macron: فرانسیسی صدر میکرون نے وزیر اعظم مودی کو کیا فون، دوطرفہ تعلقات میں پیش رفت اور یوکرین جنگ پر کیا تبادلۂ خیال

وزیرِ اعظم نریندر مودی نے ہفتے کے روز فرانسیسی صدر ایمانوئل میکرون سے ٹیلیفون پر گفتگو کی، جس میں دونوں رہنماؤں نے دو طرفہ تعاون میں پیش رفت کا جائزہ لیا اور یوکرین میں جاری جنگ کے خاتمے کے لیے کوششوں پر تبادلۂ خیال کیا۔ وزیرِ اعظم مودی نے سوشل میڈیا پلیٹ فارم ’ایکس‘ پر لکھا کہ ’’صدر میکرون کے ساتھ بہت اچھی بات چیت ہوئی۔ ہم نے مختلف شعبوں میں دو طرفہ تعاون کا جائزہ لیا اور اسے مثبت انداز میں سراہا۔ بین الاقوامی اور علاقائی امور پر بھی خیالات کا تبادلہ ہوا، جن میں یوکرین تنازع کے جلد خاتمے کی کوششیں شامل تھیں۔‘‘

انھوں نے مزید کہا کہ بھارت اور فرانس کی اسٹریٹیجک شراکت داری عالمی امن اور استحکام کو فروغ دینے میں کلیدی کردار ادا کرتی رہے گی۔ دونوں عالمی رہنماؤں کی یہ گفتگو ایسے وقت میں ہوئی ہے جب دو روز قبل یورپی کمیشن کی صدر نے بھی وزیرِ اعظم مودی سے رابطہ کیا تھا اور کہا تھا کہ ’’بھارت کو روس پر دباؤ ڈالنے اور امن کی راہ ہموار کرنے میں اہم کردار ادا کرنا ہوگا۔‘‘ یورپی یونین کی صدر اُرسلا نے کہا تھا کہ ’’ہم بھارت کی صدر زیلنسکی کے ساتھ مسلسل بات چیت کا خیرمقدم کرتے ہیں۔ بھارت اس تنازع کے خاتمے اور امن کے قیام میں ایک کلیدی فریق ہے۔‘‘

واضح رہے کہ وزیرِ اعظم مودی ماضی میں بھی روسی صدر ولادیمیر پوتن اور یوکرینی صدر ولادیمیر زیلنسکی، دونوں سے کئی مرتبہ بات چیت کر چکے ہیں۔ انھوں نے ہر بار بات چیت اور سفارت کاری کے ذریعے مسئلے کے حل پر زور دیا ہے۔ گزشتہ ماہ شنگھائی تعاون تنظیم (SCO) کے اجلاس کے موقع پر چین کے شہر تیانجن میں وزیرِ اعظم مودی نے صدر پوتن سے ملاقات کی، جب کہ اسی دوران انھوں نے صدر زیلنسکی سے بھی فون پر گفتگو کی تھی۔ زیلنسکی نے بعد میں سوشل میڈیا پر بتایا کہ ’’بھارت جنگ کے خاتمے کے لیے روس اور دیگر رہنماؤں کو مناسب پیغام دینے کے لیے تیار ہے۔‘‘ واضح رہے کہ یہ ایک ماہ کے دوران وزیرِ اعظم مودی اور زیلنسکی کے درمیان دوسری ٹیلیفونک گفتگو تھی۔ اس سے قبل 11 اگست کو دونوں رہنماؤں نے بات چیت کی تھی، جس میں مودی نے بھارت کے پرامن حل کے مؤقف کو دہراتے ہوئے کہا تھا کہ بھارت کسی بھی قسم کی جارحیت کے خلاف ہے۔

بھارت ایکسپریس اردو