آگرہ: وزیراعظم نریندر مودی نے روس کے صدر ولادیمیر پوتن کو آگرہ میں تیار کردہ سنگِ مرمر (ماربل) کا ہاتھ سے بنا خصوصی شطرنج سیٹ تحفے میں دیا، جس کے بعد آگرہ کے ہینڈی کرافٹ کاروباری اور کاریگر بے حد خوش نظر آئے۔ آگرہ میں ماربل ہینڈی کرافٹ کی بڑی صنعت قائم ہے اور یہاں تیار ہونے والے فن پارے دنیا بھر میں مقبول ہیں۔ ہینڈی کرافٹ ماربل کے ماہر کاریگر عمر نے اس اقدام کو ’’تاریخی‘‘ قرار دیتے ہوئے کہا کہ وزیراعظم مودی کی جانب سے عالمی لیڈر کو آگرہ کا تیار کردہ فن پارہ دینا پورے خطے کے کاریگروں کے لیے اعزاز کی بات ہے۔ انہوں نے کہا کہ اس تحفے کے ذریعے بھارت کی روایتی فنکاری کو عالمی شناخت مل رہی ہے، جس سے مستقبل میں ماربل ہینڈی کرافٹ کی بین الاقوامی مانگ میں اضافہ ہوگا اور چھوٹے کاریگروں کے لیے نئے روزگار کے راستے کھلیں گے۔
عمر نے مزید بتایا کہ وہ تقریباً 20 برس سے اس صنعت سے جڑے ہوئے ہیں۔ ایک خوبصورت شطرنج سیٹ تیار کرنے میں 10 سے 15 دن لگ جاتے ہیں اور اس کی پوری تیاری ہُنرمند ہاتھوں سے کی جاتی ہے۔ انہوں نے بتایا کہ اس فن پارے میں استعمال ہونے والا پتھر برما، بنگلہ دیش اور اٹلی سے منگوایا جاتا ہے، تب جاکر ایسی اعلیٰ معیار کی شطرنج تیار ہو پاتی ہے۔ آخر میں انہوں نے وزیراعظم کا شکریہ ادا کرتے ہوئے کہا کہ مودی جی نے ان کی محنت کو پوری دنیا کے سامنے پہنچایا۔
اسی ایکسپورٹ ہاؤس کے مالک عدنان شیخ نے کہا کہ وزیراعظم مودی کا یہ قدم بےحد جرأت مندانہ اور عالمی سطح پر اثر انگیز ہے۔ ایک غیر ملکی لیڈر کو آگرہ کی ہینڈ میڈ شطرنج گفٹ کرنا دراصل آگرہ کی چھپی ہوئی شناخت کو دنیا کے بڑے پلیٹ فارم پر لے جانے جیسا ہے۔ انہوں نے کہا کہ یہ بھارت کی ’’ڈائنامک خارجہ پالیسی‘‘ کی جھلک بھی ہے، جس کے ذریعے مقامی صنعتوں کو عالمی منڈی میں جگہ دلانے کی کوشش کی جا رہی ہے۔ انہوں نے مزید کہا کہ آگرہ کے کاریگروں کی مہارت کو اس طرح بین الاقوامی اہمیت ملنا پورے خطے کے لیے خوش آئند ہے۔ وزیراعظم مودی چھوٹے تاجروں اور مقامی صنعت کاروں کو عالمی سطح پر مضبوط مقام دلانے کے لیے مسلسل کوشش کر رہے ہیں۔
یوپی حکومت بھی وزیراعلیٰ یوگی آدتیہ ناتھ کی قیادت میں ’’ایک ضلع، ایک پروڈکٹ‘‘ اسکیم کے ذریعے مقامی صنعت کو فروغ دے رہی ہے، جس کے تحت روزگار میلے، نمائشیں اور خریدار و فروخت کنندہ کو براہِ راست جوڑنے کا نظام قائم کیا گیا ہے۔ اس سے بیچ کی کمیشن خوری ختم ہو رہی ہے اور چھوٹے شاہکار بنانے والے کاریگروں کو ان کی محنت کا صحیح فائدہ مل رہا ہے۔ یہ قدم نہ صرف آگرہ کی ہینڈیکرافٹ صنعت کو نئی پہچان دے گا بلکہ ثقافتی تبادلے کے طور پر بھارت کی نرمی، فن اور روایت کو بھی عالمی سطح پر نمایاں کرے گا۔ وزیراعظم نے صدر پوتن کو محض شطرنج کا تحفہ نہیں دیا، بلکہ بھارتی ثقافت کا قیمتی پیغام بھی پہنچایا ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
