فلپائن کے صدر فرڈیننڈ مارکوس جونیئر نے منگل کو وزیر اعظم نریندر مودی کا شکریہ ادا کیا کہ بھارت نے 2024 میں حوثی باغیوں کے حملے کے بعد فلپائنی شہریوں کو بحفاظت بچایا۔ وہ دہلی میں وزیر اعظم مودی کے ساتھ ایک مشترکہ پریس کانفرنس سے خطاب کر رہے تھے۔ صدر مارکوس نے کہا کہ ’’محفوظ سمندری گزرگاہیں اور سلامتی، خاص طور پر فلپائنی سیفیرز کے لیے بے حد اہم ہے، جو تقریباً ہر بین الاقوامی جہاز پر خدمات انجام دے رہے ہیں۔ میں ایک بار پھر 2024 میں حوثی باغی حملے کے بعد ہمارے شہریوں کی بہادرانہ امداد پر وزیر اعظم مودی، بھارتی عوام اور بھارتی بحریہ کا شکریہ ادا کرتا ہوں۔‘‘ انھوں نے بھارت کو ’’پہلا مددگار‘‘ قرار دیتے ہوئے کہا کہ فلپائن ایک ’’آزاد، کھلے اور شراکت پر مبنی انڈو پیسفک خط‘‘ کے لیے بھارت کے ساتھ مل کر کام کرنے کا خواہاں ہے۔
دونوں ملکوں کے درمیان عوامی روابط میں مضبوطی
صدر مارکوس نے اعلان کیا کہ فلپائن، بھارتی سیاحوں کے لیے ویزا فری انٹری کی سہولت دے گا۔ اس کے جواب میں وزیر اعظم مودی نے بھی فلپائنی سیاحوں کے لیے بھارت کی جانب سے ویزا فری اسکیم کا اعلان کیا۔ دونوں رہنماؤں نے اکتوبر 2025 سے بھارت اور فلپائن کے درمیان براہ راست پروازوں کی بحالی کا بھی خیرمقدم کیا۔
اسٹریٹجک شراکت داری کو مزید گہرا کرنے کا عزم
دونوں ممالک نے اپنی اسٹریٹجک شراکت داری کو مزید مستحکم کرنے پر اتفاق کیا، خاص طور پر میری ٹائم سیکیورٹی، فوڈ سیکیورٹی، سپلائی چین کے تحفظ اور دہشت گردی کے خلاف تعاون جیسے شعبوں میں۔ صدر مارکوس نے کہا ’’بحر ہند سے گزرنے والی سمندری راہیں ہماری ترقی اور عوام کی خوش حالی کی ضامن رہی ہیں۔ فلپائن-بھارت اسٹریٹجک شراکت داری اب صرف دو طرفہ تعلقات تک محدود نہیں رہے گی بلکہ خطے میں امن و استحکام کے لیے ایک مشترکہ کردار ادا کرے گی۔‘‘
انڈو پیسفک میں قانون کی حکمرانی پر زور
دونوں رہنماؤں نے اقوام متحدہ کے سمندری قوانین (UNCLOS) کے تحت سمندری تنازعات کے پرامن حل پر زور دیا اور آزاد و کھلے انڈو پیسفک خطے کے لیے مشترکہ عزم کا اعادہ کیا۔ صدر مارکوس نے خاص طور پر بھارت کی جانب سے 2016 کے جنوبی بحیرہ چین ثالثی فیصلے کی حمایت کو سراہا۔
آسیان میں فلپائن کی قیادت کو بھارت کی حمایت
مارکوس نے 2026 میں فلپائن کی آسیان چیئرمین شپ کے دوران بھارت کی مکمل حمایت پر شکریہ ادا کیا اور بھارت کے ساتھ آسیان-بھارت جامع اسٹریٹجک شراکت داری کو مزید مضبوط کرنے کا عزم ظاہر کیا۔ صدر مارکوس نے کہا کہ ’’آج ہم فلپائن اور بھارت کے تعلقات کے ایک نئے، قریبی اور مؤثر دور میں داخل ہو رہے ہیں، جو کئی جہتوں پر مشتمل ہوگا۔ میں وزیر اعظم مودی، صدر دروپدی مرمو اور بھارتی عوام کا اپنے پرتپاک استقبال کے لیے تہہ دل سے شکریہ ادا کرتا ہوں۔‘‘
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
