پٹنہ: بھوجپوری فلم انڈسٹری کے مشہور اداکار پون سنگھ کی اہلیہ جیوتی سنگھ نے سیاست میں قدم رکھتے ہوئے کاراکاٹ اسمبلی سیٹ سے آزاد امیدوار کے طور پر نامزدگی داخل کر دی ہے۔ ان کے اس فیصلے نے نہ صرف سیاسی حلقوں میں بلکہ بھوجپوری فلم دنیا میں بھی ہلچل مچا دی ہے۔
VIDEO | Bihar polls: Independent candidate Jyoti Singh files nomination from Karakat seat.
(Full video available on PTI Videos –https://t.co/n147TvrpG7) pic.twitter.com/NNRuHBqFw2
— Press Trust of India (@PTI_News) October 20, 2025
سوشل میڈیا کے ذریعے سیاست میں آنے کا اشارہ
جیوتی سنگھ نے چند دن قبل ہی انسٹاگرام پر ایک پوسٹ کے ذریعے عوام سے رائے طلب کی تھی کہ آیا وہ انتخابات میں حصہ لیں یا نہیں۔ اپنی پوسٹ میں انہوں نے لکھا تھا: ’’نمسکار کاراکاٹ کی دیوتا جیسی عوام! میں کشمکش میں ہوں، 50 فیصد لوگ میرے انتخاب لڑنے کے حق میں ہیں جبکہ باقی مخالفت کر رہے ہیں۔ ایسے میں میں آپ کی رائے کے بغیر کوئی فیصلہ نہیں لینا چاہتی۔‘‘ اسی پوسٹ کے بعد ان کے سیاست میں آنے کے اشارے واضح ہو گئے تھے، جو اب عملی شکل اختیار کر گئے ہیں۔
شوہر پون سنگھ پر سنگین الزامات
یہ پہلا موقع نہیں جب جیوتی سنگھ سرخیوں میں آئی ہوں۔ وہ طویل عرصے سے اپنے شوہر پون سنگھ کے ساتھ ازدواجی تنازعات کے سبب خبروں میں رہی ہیں۔ حال ہی میں انہوں نے سوشل میڈیا پر ایک جذباتی ویڈیو جاری کیا تھا، جس میں پون سنگھ پر سنگین الزامات لگائے گئے تھے۔ تاہم پون سنگھ نے تمام الزامات کو غلط اور بے بنیاد قرار دیا تھا۔ ایک پریس کانفرنس میں انہوں نے کہا تھا: ’’میری بیوی سیاست میں آنا چاہتی ہیں، اسی لیے وہ جھوٹے الزامات لگا رہی ہیں۔ ان کا مقصد الیکشن لڑنا ہے، اس لیے وہ غیر ضروری تنازعہ پیدا کر رہی ہیں۔‘‘ پون سنگھ نے یہ بھی الزام لگایا تھا کہ جیوتی سنگھ کے والد چاہتے ہیں کہ ان کی بیٹی ایم ایل اے (رکن اسمبلی) بنے۔ انہوں نے کہا تھا: ’’مجھے امید نہیں تھی کہ سیاست میں آنے کے لیے کوئی اس حد تک گر سکتا ہے۔‘‘
سیاسی میدان میں باضابطہ انٹری—پون سنگھ خاموش
اب جیوتی سنگھ نے تمام قیاس آرائیوں کو ختم کرتے ہوئے خود میدان میں اترنے کا اعلان کر دیا ہے۔ انہوں نے پیر کے روز باضابطہ نامزدگی فارم داخل کر دیا۔ تاہم اس پر ابھی تک پون سنگھ کی جانب سے کوئی ردِعمل سامنے نہیں آیا۔
30 کروڑ روپے نان و نفقہ کا مطالبہ
ذرائع کے مطابق دونوں کے درمیان طلاق کا مقدمہ عدالت میں زیر سماعت ہے۔ حال ہی میں میڈیا رپورٹس میں بتایا گیا تھا کہ جیوتی سنگھ نے پون سنگھ سے علیحدگی کے بدلے 30 کروڑ روپے کے الاؤنس کا مطالبہ کیا ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
