بہار کے سابق نائب وزیر اعلیٰ تجسو ی یادو۔
بھاگلپور: بہار کے سابق نائب وزیر اعلیٰ اور اپوزیشن لیڈر تیجسوی یادو اپنی ’کاریکرتا درشن اور سمواد یاترا‘ کے حصہ کے طور پر اتوار کے روزبھاگلپور پہنچے۔ انہوں نے ضلعی سطح سے لے کر بوتھ سطح تک کارکنوں سے ملاقات کی اور بات چیت کی۔
بھاگلپور میں صحافیوں سے بات چیت کے دوران انہوں نے کہا کہ وہ کارکنوں سے ملاقات کرکے اور ان سے بات چیت کرکے تنظیم کی خامیوں کو جاننے کی کوشش کررہے ہیں۔ اس دوران ہم علاقے کے مسائل کو بھی سمجھ رہے ہیں۔ انہوں نے بتایا کہ اب تک ان کی یاترا19 اضلاع تک پہنچ چکی ہے۔ تمام معلومات حاصل کرنے کے بعد وہ عوام کو بتائیں گے کہ وہ ان کے لیے کیا کریں گے۔
بھاگلپور میں بہار کے وزیر اعلی نتیش کمار کو نشانہ بناتے ہوئے انہوں نے کہا کہ اب ان کے پاس کوئی ویژن نہیں ہے۔ آر جے ڈی لیڈر نے کہا، ’’وہ اب تھک چکے ہیں۔ وزیر اعلیٰ ریٹائرڈ افسروں کے ساتھ بہار چلا رہے ہیں۔ ہر اہم جگہ پر ریٹائرڈ افسر رکھے گئے ہیں۔ جو افسران قابل ہیں انہیں نہیں آنے دیا جا رہا ہے۔‘‘
انہوں نے یہاں تک کہا کہ صورتحال ایسی ہے کہ کئی چیزوں کی معلومات وزیر اعلیٰ کو نہیں دی جاتی ہیں۔ وزیر اعلیٰ بھی اہم معاملات پر خاموش رہتے ہیں۔ گرینڈ الائنس کے 17 ماہ کے دور میں حاصل ہونے والی کامیابیوں پر بات کرتے ہوئے انہوں نے کہا کہ اس عرصے میں کئی اہم کام ہوئے۔ پانچ لاکھ لوگوں کو نوکریاں دی گئیں اور ذات پات کی مردم شماری کرائی گئی۔
بہار میں گرینڈ الائنس حکومت کے قیام کے بعد خواتین کو 2500 روپے ماہانہ دینے کا وعدہ کرتے ہوئے انہوں نے کہا کہ اس سے خواتین خوشحال ہوں گی۔
انہوں نے اسمارٹ میٹرز کے حوالے سے حکومت پر سیاسی حملہ بھی کیا۔ تیجسوی یادو نے کہا کہ آج بہار میں بجلی سب سے مہنگی ہو رہی ہے۔ لوگ اسمارٹ میٹرز سے پریشان ہیں۔ غیر معقول بل آرہے ہیں۔ ہماری حکومت 200 یونٹ مفت بجلی فراہم کرے گی۔ اس دوران انہوں نے امتحانات میں پیپر لیک ہونے کے معاملے پر بھی حکومت کو آڑے ہاتھوں لیا۔
بھارت ایکسپریس۔
