اتر پردیش میں ایک نیا تنازعہ اس وقت سامنے آیا جب وزیر اعلیٰ یوگی آدتیہ ناتھ کی کابینہ کے وزیر اور سہیل دیو بھارتیہ سماج پارٹی (ایس بی ایس پی) کے سربراہ اوم پرکاش راج بھر نے اپنی ایک نئی فوج تشکیل دینے کا اعلان کیا، جس کا نام ’راشٹریہ سہیل دیو سینا (آر ایس ایس)‘ رکھا گیا ہے۔ نام کے باعث اس تنظیم کی موازنہ سیدھے طور پر راشٹریہ سویم سیوک سنگھ (آر ایس ایس) سے کی جانے لگی ہے، جس سے سیاسی حلقوں میں ہلچل پیدا ہو گئی ہے۔ راج بھر کی اس فوج کے نام اور ڈھانچے کو دیکھتے ہوئے لوگ چونک گئے، کیونکہ ملک میں آر ایس ایس نام صرف ایک ہی بڑی تنظیم کے لیے مشہور ہے۔ لیکن اب اوم پرکاش راج بھر نے اسی مخفف کو استعمال کرتے ہوئے اپنی نئی “فوج” تیار کر لی ہے، جسے انہوں نے گاؤں کے نوجوانوں کی ترقی اور تربیت کا ذریعہ بتایا ہے۔
فوج کی ساخت، لباس اور عہدے
راشٹریہ سہیل دیو سینا کے جوانوں کو خاص نیلی وردی، پیلی بیلٹ، بیریٹ کیپ اور ہاتھ میں پیلا ڈنڈا دیا گیا ہے۔ فوج کے اندر کمانڈر، سی او، ڈی ایس پی، ایس آئی اور انسپکٹر جیسے عہدے بنائے گئے ہیں۔ ہر عہدے کے مطابق کندھوں پر ستارے اور سینے پر بیجز لگائے گئے ہیں۔ راج بھر کے مطابق ”ہم نے گاؤں کے نوجوانوں کو ہنر مند بنانے، انہیں ٹریننگ دینے اور سماج کی خدمت کے لیے تیار کرنے کے مقصد سے یہ سینا بنائی ہے“۔ انہوں نے کہا کہ یہ جوان لوگوں کی مدد کریں گے، گاؤں میں نظم و ضبط قائم رکھنے میں تعاون کریں گے اور مختلف سماجی سرگرمیوں میں حصہ لیں گے۔ ان کا دعویٰ ہے کہ اس تنظیم کے ذریعے نوجوان اپنی صلاحیتوں کو بہتر بنا کر بہتر روزگار کے مواقع حاصل کر سکیں گے۔
کیا کرے گی نئی آر ایس ایس؟
راشٹریہ سہیل دیو سینا کا آغاز صوبے کے 22 اضلاع میں کیا گیا ہے۔ راج بھر کا ابتدائی ہدف اپنی فوج میں ایک لاکھ نوجوانوں کو شامل کرنا ہے۔ وہ فوج کے ذریعے لوگوں کو تربیت دینا چاہتے ہیں۔ ریٹائرڈ آئی اے ایس، پی سی ایس اور لیکھ پال وغیرہ بھی راج بھر کے جوانوں کو تربیت دیں گے، جس سے ان کی مہارت میں اضافہ ہوگا۔
راج بھر نے واضح کیا کہ ان کی تنظیم کوئی نجی فورس نہیں بلکہ سماجی خدمت اور نوجوانوں کے اسکل ڈیولپمنٹ کا پلیٹ فارم ہے۔ تاہم، سیاسی ماہرین کا کہنا ہے کہ اس قدم کے سیاسی اثرات بھی دیکھنے کو مل سکتے ہیں، کیونکہ تنظیم کا نام اور ڈھانچہ پہلے سے موجود آر ایس ایس سے مشابہت رکھتا ہے، جس پر بحث بڑھ رہی ہے۔ فی الحال، اوم پرکاش راج بھر کی یہ نئی فوج سرخیوں میں ہے اور دیکھنا یہ ہے کہ آنے والے دنوں میں یہ “نئی آر ایس ایس” کیا شکل اختیار کرتی ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
