ممبئی: مہاراشٹر کی پہلی خاتون نائب وزیر اعلیٰ کے طور پر حلف لینے کے بعد سنیترا پوار نے ہفتہ کے روز وزیر اعظم نریندر مودی کی جانب سے دی گئی مبارکباد پر ان کا شکریہ ادا کیا۔
سنیترا پوار نے کہا، ’’آپ کی جانب سے دیا گیا آشیرواد میرے لیے باعثِ حوصلہ ہے۔ جیسے ہی میں مہاراشٹر کی خدمت کے لیے اپنی نئی ذمہ داری سنبھال رہی ہوں، آپ کے الفاظ نے عوامی فلاح کے کاموں میں میرا اعتماد مزید مضبوط کیا ہے۔ ریاست کے عوام کی بھلائی کے لیے ایمانداری اور مکمل لگن کے ساتھ کام کرنے کا میرا عزم اور بھی پختہ ہو گیا ہے۔ آپ کے اعتماد کے لیے دل سے شکریہ۔‘‘
اپنے شوہر اور سابق نائب وزیر اعلیٰ، آنجہانی اجیت پوار کا ذکر کرتے ہوئے سنیترا پوار نے سوشل میڈیا پلیٹ فارم ’ایکس‘ پر لکھا، ’’اجیت دادا نے کسانوں، مزدوروں، خواتین، نوجوانوں اور محروم طبقات کے لیے اپنی پوری زندگی وقف کر دی۔ آج ’شیو–شاہو–پھولے–امبیڈکر‘ کے اصولوں سے غیر متزلزل وابستگی کے ساتھ ان کے خیالات کی وراثت کو آگے بڑھاتے ہوئے، فرض شناسی کے جذبے کے تحت نائب وزیر اعلیٰ کے عہدے کی ذمہ داری قبول کرتے وقت میرا دل بھر آیا ہے۔‘‘
انہوں نے مزید کہا، ’’دادا کے اچانک انتقال سے مجھے گہرے صدمے کا سامنا کرنا پڑا ہے، لیکن میرا اصل سہارا فرض شناسی، جدوجہد کی طاقت اور عوام کے ساتھ وہ مضبوط رشتہ ہے جو انہوں نے مجھے سکھایا۔ میں ان کے خوابوں کے مطابق ایک منصفانہ، مساوات پر مبنی اور ترقی یافتہ مہاراشٹر کی تعمیر کے لیے پوری ایمانداری اور محنت کے ساتھ کام کرتی رہوں گی۔ ان مشکل حالات میں مہاراشٹر کے عوام کی محبت اور حمایت ہی میری اصل طاقت ہے۔ آپ کے اعتماد کی قوت سے دادا کے نظریات کو روشن رکھتے ہوئے میں نئی امید کے ساتھ آگے بڑھوں گی۔‘‘
اس سے قبل سنیترا پوار نے مہاراشٹر کی پہلی خاتون نائب وزیر اعلیٰ کے طور پر حلف اٹھایا۔ لوک بھون میں منعقدہ ایک سادہ تقریب میں ریاست کے گورنر آچاریہ دیووَرت نے انہیں عہدے اور رازداری کا حلف دلایا۔
حلف برداری کی تقریب میں وزیر اعلیٰ دیویندر فڑنویس، نائب وزیر اعلیٰ ایکناتھ شندے کے علاوہ وزراء اور اراکینِ اسمبلی موجود تھے۔ حلف برداری سے قبل سنیترا پوار کو متفقہ طور پر این سی پی قانون ساز پارٹی کا لیڈر منتخب کیا گیا۔ ان کے نام کی تجویز پارٹی کے سینئر لیڈر چھگن بھجبل نے پیش کی، جس کی تائید دلیپ ولسے پاٹل اور دیگر کئی اراکینِ اسمبلی نے کی۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
