It is a BJP-NDA government in Maharashtra: مہاراشٹر میں بی جے پی-این ڈی اے کی حکومت ہے، راج ٹھاکرے کی نہیں، ممبئی میں چھٹھ کے گانوں پر تنازع سے بھڑکے پرشانت کشور

نئی دہلی:مہاراشٹر نو نرمان سینا (ایم این ایس) کے سربراہ راج ٹھاکرے نے حال ہی میں بہار کے عظیم تہوار چھٹھ پوجا اور بھوجپوری گانوں کو لے کر تنازع کھڑا کردیا تھا۔ انہوں نے چھٹھ اور بھوجپوری گانوں کو ’مہاراشٹر کی ثقافت پر حملہ‘ قرار دیا تھا اور ریلوے اسٹیشنوں پر بجائے جانے والے بھوجپوری گانے بند کروا دیے تھے۔ اب اس معاملے پر جن سوراج کے سربراہ اور بانکی پور کے رکن اسمبلی پرشانت کشور کا ردعمل سامنے آیا ہے۔ پی کے نے راج ٹھاکرے کو سخت تنقید کا نشانہ بنایا ہے۔دراصل، جب پرشانت کشور سے راج ٹھاکرے کے اس قدم کے بارے میں سوال کیا گیا تو انہوں نے میڈیا سے بات کرتے ہوئے کہا، ’’آپ لوگ راج ٹھاکرے جیسے غیر ذمہ دار لوگوں کو بلاوجہ اہمیت دیتے ہیں۔ جب کوئی اس شخص کو نہیں پوچھتا تو یہ اتر پردیش اور بہار کے لوگوں کے بارے میں بیان دے کر میڈیا میں جگہ حاصل کرتا ہے۔ ایسے لوگوں کو بالکل بھی اہمیت اور جگہ نہیں دینی چاہیے۔‘‘

’راج ٹھاکرے کہاں ہیں، انہیں کون پوچھتا ہے؟‘

مہاراشٹر نو نرمان سینا کے سربراہ پر تنقید کرتے ہوئے پرشانت کشور نے مزید کہا، ’’راج ٹھاکرے کہاں کھڑے ہیں، انہیں خود نہیں معلوم۔ کبھی وزیر اعظم نریندر مودی کی تعریف کرنے لگتے ہیں اور اگلے ہی دن ان کی شکایت کرنے لگتے ہیں۔ کبھی اِدھر ہوجاتے ہیں تو کبھی اُدھر۔ ان کا صرف ایک ہی ایجنڈا ہے کہ کسی طرح میڈیا میں بنے رہیں۔‘‘

’مہاراشٹر میں بی جے پی-این ڈی اے کی حکومت ہے، راج ٹھاکرے کی نہیں‘

جن سوراج کے سربراہ نے مزید کہا، ’’جب کوئی چھ ماہ تک نہیں پوچھتا تو یہ اتر پردیش اور بہار کے لوگوں کے خلاف کوئی بیان دے دیتے ہیں۔ ورنہ کون پوچھ رہا ہے کہ راج ٹھاکرے کہاں ہیں؟ وہاں حکومت این ڈی اے اور بی جے پی کی ہے۔ اگر ہندی بولنے والوں کے خلاف کچھ ہوگا تو بہار اور اتر پردیش کے لوگ بی جے پی سے سوال کریں گے اور جواب مانگیں گے۔ یہ کسی کے والد کی حکومت تھوڑی ہے۔ راج ٹھاکرے کون ہیں؟‘‘پرشانت کشور کے اس بیان کے بعد چھٹھ پوجا اور بھوجپوری گانوں کو لے کر مہاراشٹر میں پیدا ہونے والا تنازع ایک بار پھر سیاسی بحث کا موضوع بن گیا ہے۔

بھارت ایکسپریس اردو