Indian government’s relief efforts in Myanmar: ہندوستانی حکومت نے منڈالے میں قائم کیا فیلڈ اسپتال، آئی این ایس گھڑیال مزید 440 ٹن امدادی سامان کے ساتھ روانہ

ہندوستان نے زلزلہ زدہ میانمار کو امداد فراہم کرنے میں مزید پیش رفت کرتے ہوئے تقریباً 440 ٹن وزنی امدادی سامان لے کر آئی این ایس گھڑیال منگل کو وشاکھاپٹنم بندرگاہ سے روانہ ہوا۔ وہیں منڈالے میں ہندوستانی فوج کے ذریعہ قائم کردہ ایک فیلڈ اسپتال بھی زخمیوں کی طبی دیکھ بھال کے لیے کام کرنے لگا ہے۔

ہندوستانی بحریہ کے جہاز آئی این ایس ستپورہ اور آئی این ایس ساوتری تقریباً 40 ٹن امدادی سامان لے کر 31 مارچ کو ینگون پہنچے تھے، جب کہ آئی این ایس کرموک اور ایل سی یو 52 جو سری وجیا پورم سے 30 مارچ کو روانہ ہوئے تھے، منگل کو تقریباً 30 ٹن امدادی سامان لے کر ینگون پہنچے تھے۔ بحریہ کے ایک ترجمان نے بتایا کہ میانمار میں جاری امدادی کوششوں کو مزید تیز کرتے ہوئے، آئی این ایس گھڑیال، چاول، خوردنی تیل اور ادویات سمیت تقریباً 440 ٹن وزنی امدادی سامان لے کر منگل کی صبح وشاکھاپٹنم بندرگاہ سے روانہ ہوا ہے۔

ہندوستان نے پیر کے روز 7.7 شدت کے زلزلے سے متاثرہ میانمار کے لوگوں کی مدد کے لیے میانمار کو 50 ٹن امدادی سامان کی ایک تازہ قسط پہنچائی ہے۔ میانمار میں اس زلزلے نے 2,000 سے زیادہ افراد کی جانیں لی ہیں اور 3,900 افراد زخمی ہوئے ہیں۔ یہ امدادی سامان میانمار کے شہر ینگون آئی این ایس ستپورہ اور آئی این ایس ساوتری پر لے جایا گیا۔ ہندوستان نے جمعہ کو میانمار کے ساتھ ساتھ تھائی لینڈ میں آنے والے زلزلے سے ہونے والی تباہی کے فوری ردعمل کے طور پر ’’آپریشن برہما‘‘ کے نام سے اپنا امدادی مشن شروع کیا تھا۔ ہفتے کے روز ہندوستانی حکومت نے زلزلے کے متاثرین کی مدد کے لیے پانچ فوجی طیاروں میں امدادی سامان، امدادی ٹیمیں اور طبی سامان میانمار بھیجا۔

حکام نے بتایا کہ ’’آپریشن برہما‘‘ کے تحت ہندوستانی فوج کی جاری انسانی امداد کے ایک حصے کے طور پر 118 اہلکاروں پر مشتمل فیلڈ اسپتال ’’منڈالے میں کامیابی سے قائم کر دیا گیا ہے‘‘۔ اسپتال کے یونٹ کو میانمار میں IAF کے دو C-17 ہیوی لفٹ طیاروں کا استعمال کرتے ہوئے تعینات کیا گیا تھا، جنھوں نے ہفتے کے روز آگرہ سے اڑان بھری تھی۔ ایک اہلکار نے بتایا کہ یہ فیلڈ اسپتال اب ’’200 بستروں کی گنجائش کے ساتھ مکمل طور پر کام کر رہا ہے۔‘‘ انھوں نے مزید کہا کہ ’’آج صبح منڈالے کے وزیر اعلیٰ U Myo Aung نے اس سہولت کا دورہ کیا اور اس کی صلاحیتوں کا جائزہ لیا۔‘‘ اہلکار نے کہا کہ فیلڈ ہسپتال ضرورت مندوں کو اہم طبی دیکھ بھال فراہم کرنے کے لیے مکمل طور پر تیار ہے۔

منڈالے کا فیلڈ ہسپتال فعال طور پر طبی امداد فراہم کر رہا ہے، جس نے اب تک 104 مریضوں کا علاج کیا ہے۔ اہلکار نے بتایا کہ سہولت کے سرجنوں نے زندگی بچانے والی دو کامیاب سرجریاں بھی کی ہیں۔ دریں اثنا میانمار میں ہندوستانی سفارت خانے نے منگل کو ایکس پر مزید امدادی خدمات کی اطلاع دی اور امدادی کاموں کی چند تصاویر بھی شیئر کیں۔

بھارت ایکسپریس اردو