کانگریس نے اتوار کو کہا کہ پارٹی 21 جولائی سے شروع ہونے والے پارلیمنٹ کے مانسون اجلاس میں جموں و کشمیر کا مکمل ریاست کا درجہ بحال کرنے کا مطالبہ اٹھائے گی۔ اے آئی سی سی جنرل سکریٹری (برائے تنظیم) کے سی وینوگوپال نے پوچھا کہ ’’کیا پی ایم مودی نے جموں و کشمیر کو ریاست کا درجہ دینے کے بارے میں پارلیمنٹ کے فلور پر جھوٹ بولا؟ اگر نہیں تو جموں و کشمیر پولیس نے جے کے پی سی سی کے صدر طارق حمید قرہ جی اور دیگر کانگریسی لیڈران کو کیوں گرفتار کیا ہے؟‘‘
وینوگوپال نے اپنی پوسٹ میں مزید کہا کہ ’’پارلیمنٹ کے اگلے اجلاس میں انڈیا بلاک جموں و کشمیر میں فوری طور پر مکمل ریاست کا درجہ بحال کرنے کا مطالبہ کرے گا۔ یہ مذاق مزید نہیں چل سکتا۔‘‘ پہلے بھی کانگریس نے زور دے کر کہا ہے کہ وہ جموں و کشمیر کو مکمل ریاست کا درجہ دینے کے معاملے کو اٹھاتی رہے گی، جہاں وہ عمر عبداللہ کی نیشنل کانفرنس کے ساتھ اتحاد میں اقتدار میں ہے۔
پولیس نے کانگریس کو ریاست کے درجے کی بحالی کی مانگ کرتے ہوئے راج بھون تک مارچ کرنے سے روکا
واضح رہے کہ اتوار کو کانگریس کے سینکڑوں کارکنوں کو پولیس نے ریاستی حیثیت کے لیے مارچ کے دوران حراست میں لیا۔ یہ دوسرا موقع ہے جب پولیس نے کانگریس کو ’’ہماری ریاست ہمارا حق‘‘ کے بینر تلے منعقد ہونے والی ریلی کی اجازت نہیں دی۔ پردیش کانگریس کمیٹی کے صدر طارق حمید قرہ اور پارٹی جنرل سکریٹری جی اے میر کی قیادت میں سیکڑوں کانگریس کارکن جموں کے قلب میں واقع شہیدی چوک میں پارٹی ہیڈ کوارٹر میں جمع ہوئے اور وہ لیفٹیننٹ گورنر منوج سنہا کو میمورنڈم پیش کرنے کے لیے راج بھون تک مارچ کرنے والے تھے، لیکن پولیس کی رکاوٹوں نے انھیں ناکام بنا دیا۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
