بھارتی محکمۂ موسمیات (آئی ایم ڈی) نے ملک بھر کے کروڑوں شہریوں کے لیے اہم موسمی انتباہ جاری کرتے ہوئے کہا ہے کہ شمال مغربی خلیجِ بنگال کے اوپر ایک انتہائی مضبوط اور گہرے کم دباؤ کا نظام تشکیل پا چکا ہے، جس کے باعث آئندہ چند دنوں میں ملک کے کئی حصوں میں شدید سے انتہائی شدید بارش، تیز آندھی، آسمانی بجلی اور سیلاب جیسی صورتحال پیدا ہونے کا خدشہ ہے۔ آئی ایم ڈی کے تازہ بلیٹن کے مطابق یہ موسمی نظام اگلے تین دنوں کے دوران شمالی اوڈیشہ اور چھتیس گڑھ کی جانب تیزی سے بڑھے گا۔ اس کے اثرات کے نتیجے میں آئندہ چار سے پانچ دنوں تک وسطی، مغربی اور شمالی بھارت کی متعدد ریاستوں میں موسلا دھار بارش متوقع ہے، جبکہ بعض علاقوں میں انتہائی شدید بارش سے معمولات زندگی متاثر ہونے کا اندیشہ ظاہر کیا گیا ہے۔
13 ریاستوں میں موسلا دھار بارش، تیز آندھی اور آسمانی بجلی گرنے کا الرٹ
محکمۂ موسمیات نے اگلے آٹھ گھنٹوں کے لیے خصوصی ایمرجنسی موسمی بلیٹن بھی جاری کیا ہے۔ اس کے تحت اتر پردیش، بہار، دہلی، اتراکھنڈ، پنجاب، ہماچل پردیش، جھارکھنڈ، مغربی بنگال، ہریانہ سمیت مجموعی طور پر 13 ریاستوں میں ہلکی سے موسلا دھار بارش، تیز آندھی اور آسمانی بجلی گرنے کا الرٹ جاری کیا گیا ہے۔ آئی ایم ڈی کے مطابق بارش کے دوران میدانی اور پہاڑی علاقوں میں 60 سے 80 کلومیٹر فی گھنٹہ کی رفتار سے تیز ہوائیں چل سکتی ہیں۔ محکمہ نے خبردار کیا ہے کہ کئی علاقوں میں شدید گرج چمک کے ساتھ آسمانی بجلی گرنے کا بھی خطرہ ہے، جس سے جانی و مالی نقصان کا اندیشہ ہے۔
دہلی – این سی آر میں شروع ہوگا آفت کا دور؟
قومی دارالحکومت دہلی اور این سی آر کے علاقوں میں بھی موسم نے اچانک کروٹ لی ہے۔ 5 جولائی سے 7 جولائی تک مسلسل بارش، تیز آندھی اور طوفانی موسم کی پیش گوئی کی گئی ہے۔ اس دوران شدید گرمی اور حبس سے راحت ملنے کے ساتھ درجہ حرارت میں نمایاں کمی آنے کا امکان ہے۔ ہفتے کی صبح سے ہی دہلی کے آسمان پر گہرے بادل چھائے ہوئے ہیں اور کئی علاقوں میں ہلکی بارش کا سلسلہ شروع ہو چکا ہے، جبکہ دوپہر کے بعد تیز بارش اور آندھی کی پیش گوئی کی گئی ہے۔
اتر پردیش اور بہار میں بھی مانسون پوری شدت کے ساتھ سرگرم
اتر پردیش اور بہار میں بھی مانسون پوری شدت کے ساتھ سرگرم ہے۔ محکمۂ موسمیات کے مطابق 5 سے 10 جولائی تک اتر پردیش کے بیشتر علاقوں میں مسلسل بارش کا سلسلہ جاری رہے گا۔ مشرقی یوپی میں آج اور کل جبکہ مغربی یوپی میں 7 جولائی تک کئی مقامات پر شدید بارش متوقع ہے۔ اس کے بعد 8 سے 10 جولائی کے درمیان ریاست بھر میں ریکارڈ بارش ہونے کا امکان ظاہر کیا گیا ہے۔ادھر بہار میں بھی 10 جولائی تک وقفے وقفے سے موسلا دھار بارش جاری رہنے کی پیش گوئی کی گئی ہے۔ 6، 7 اور 10 جولائی کو بعض اضلاع میں انتہائی شدید بارش، تقریباً 40 کلومیٹر فی گھنٹہ کی رفتار سے ہوائیں چلنے اور آسمانی بجلی گرنے کا خدشہ ظاہر کیا گیا ہے، جس کے پیش نظر عوام کو احتیاط برتنے اور غیر ضروری طور پر گھروں سے باہر نہ نکلنے کی ہدایت دی گئی ہے۔
راجستھان اور جھارکھنڈ میں تیز ہواؤں کا پہرا
بھارتی محکمۂ موسمیات (آئی ایم ڈی) کے مطابق راجستھان میں اس سال مانسون غیر معمولی طور پر سرگرم رہنے کا امکان ہے۔ 5 سے 10 جولائی کے دوران ریاست کے بیشتر علاقوں میں بارش کا سلسلہ جاری رہے گا۔ مشرقی راجستھان میں آج 5 جولائی سے 7 جولائی تک اور پھر 9 جولائی کو بعض مقامات پر انتہائی شدید بارش کی پیش گوئی کی گئی ہے، جبکہ مغربی راجستھان کے خشک سالی سے متاثرہ علاقوں میں بھی 6 سے 8 جولائی کے درمیان اچھی بارش ہونے کا امکان ظاہر کیا گیا ہے۔
ادھر جھارکھنڈ میں بھی مانسون پوری طرح فعال ہو چکا ہے۔ محکمۂ موسمیات کے مطابق 5 سے 8 جولائی تک ریاست کے بیشتر حصوں میں مسلسل بارش متوقع ہے۔ آج مختلف علاقوں میں 40 سے 50 کلومیٹر فی گھنٹہ کی رفتار سے تیز ہوائیں چلنے کا امکان ہے، جس کے پیش نظر انتظامیہ نے شہریوں کو خراب موسم کے دوران کھلے مقامات اور درختوں کے نیچے کھڑے ہونے سے گریز کرنے کی سخت ہدایت دی ہے۔
پہاڑوں پر زمینی تودے گرنے کا خدشہ
دوسری جانب پہاڑی ریاستوں ہماچل پردیش اور اتراکھنڈ میں آئندہ پانچ دن انتہائی حساس رہنے والے ہیں۔ اتراکھنڈ میں آج 5 جولائی کو بعض مقامات پر انتہائی موسلا دھار بارش کا امکان ہے، جبکہ 6 سے 10 جولائی تک مسلسل شدید بارش کا الرٹ جاری کیا گیا ہے۔
ہماچل پردیش میں بھی 6 اور 7 جولائی کو بہت زیادہ بارش کی پیش گوئی کی گئی ہے۔ مسلسل بارش کے باعث پہاڑی علاقوں میں لینڈ سلائیڈنگ، اچانک سیلاب، آبی جمعاؤ اور دریاؤں و ندی نالوں میں پانی کی سطح خطرناک حد تک بڑھنے کا خدشہ ہے۔ محکمۂ موسمیات نے خبردار کیا ہے کہ اس صورتحال کے باعث کئی قومی شاہراہیں اور رابطہ سڑکیں بھی متاثر ہو سکتی ہیں، لہٰذا شہریوں اور مسافروں کو غیر ضروری سفر سے گریز کرنے اور مقامی انتظامیہ کی ہدایات پر عمل کرنے کا مشورہ دیا گیا ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
