نئی دہلی : ایم کے اسٹالن نے تامل ناڈواسمبلی انتخابات میں بھاری شکست کے بعد وزیر اعلیٰ کے عہدے سے استعفیٰ دے دیا ہے۔ انہوں نے اپنا استعفیٰ گورنر راجندر شواناتھ ارلیکر کو پیش کیا، جسے قبول کر لیا گیا ہے۔گورنر کی جانب سے جاری بیان کے مطابق ایم کے اسٹالن اور ان کی کابینہ کا استعفیٰ منظور کرتے ہوئے انہیں نئی حکومت کی تشکیل تک عبوری وزیر اعلیٰ کے طور پر ذمہ داریاں جاری رکھنے کی ہدایت دی گئی ہے۔ یہ قدم آئینی روایت کے تحت اٹھایا گیا ہے تاکہ نئی حکومت کے حلف لینے تک انتظامی تسلسل برقرار رہے۔
اسٹالن کا استعفیٰ حالیہ انتخابات میں ڈی ایم کےکی قیادت والے اتحاد کی واضح شکست کے بعد سامنے آیا ہے۔ 234 رکنی اسمبلی میں ڈی ایم کے اتحاد کو صرف 73 نشستیں حاصل ہوئیں، جو اکثریت کے لیے درکار 118 نشستوں سے کافی کم ہیں۔ پارٹی نے 164 نشستوں پر مقابلہ کیا تھا، تاہم وہ تقریباً 60 نشستوں پر ہی کامیابی حاصل کر سکی۔
انتخابات میں اسٹالن کو ذاتی طور پر بھی بڑا دھچکا لگا ہے۔ وہ اپنی روایتی کولاتھور نشست سے شکست کھا گئے، جہاں انہیں وی ایس بابو نے ہرایا۔ یہ نتیجہ ریاستی سیاست میں بڑی تبدیلی کا اشارہ سمجھا جا رہا ہے۔سیاسی مبصرین کے مطابق کسی موجودہ وزیر اعلیٰ کی اپنی نشست سے شکست ایک غیر معمولی واقعہ ہے۔ اس سے قبل 1996 میں جے للیتا کو بھی ایسی ہی شکست کا سامنا کرنا پڑا تھا۔اس انتخاب میں اداکار سے سیاستدان بننے والے وجے کی قیادت میں تمیزہگاویٹری کزگم سب سے بڑی جماعت بن کر ابھری ہے، تاہم اسے بھی واضح اکثریت حاصل نہیں ہو سکی۔ اس صورتحال کے پیش نظر ریاست میں حکومت سازی کے لیے سیاسی سرگرمیاں تیز ہو گئی ہیں اور مختلف امکانات پر غور کیا جا رہا ہے۔ماہرین کا کہنا ہے کہ تمل ناڈو کی سیاست میں یہ ایک اہم موڑ ہے، جہاں عوام کے بدلتے رجحانات واضح نظر آ رہے ہیں۔ آنے والے دنوں میں یہ طے ہوگا کہ کون سی جماعت یا اتحاد حکومت بناتا ہے اور ریاست کی سیاسی سمت کیا رخ اختیار کرتی ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
