PM Modi in Ghana: گلوبل ساؤتھ کی آواز عالمی ترقی کے لیے ضروری، وزیر اعظم مودی نے گھانا کی پارلیمنٹ سے خطاب میں کہا

وزیر اعظم نریندر مودی نے جمعرات کو گھانا کی پارلیمنٹ سے خطاب کرتے ہوئے عالمی حکمرانی میں اصلاحات اور گلوبل ساؤتھ کی آواز کو بلند کرنے کی ضرورت پر زور دیا۔ انھوں نے کہا کہ موجودہ عالمی چیلنجز جیسے ماحولیاتی تبدیلی، وبائیں، دہشت گردی اور سائبر سیکیورٹی، ایسی پیچیدہ صورتیں اختیار کر چکے ہیں جن سے گزشتہ صدی کے ادارے مؤثر انداز میں نمٹنے میں ناکام ہو رہے ہیں۔

وزیر اعظم مودی نے کہا کہ ’’بدلتے حالات میں مؤثر اور قابلِ اعتماد اصلاحات کی ضرورت ہے۔ ترقی اس وقت تک ممکن نہیں جب تک گلوبل ساؤتھ کو اس کا حق نہ دیا جائے۔ صرف نعرے نہیں، ہمیں عملی اقدامات کی ضرورت ہے۔‘‘ وزیر اعظم نے کہا کہ اسی وژن کے تحت بھارت کی G20 صدارت کے دوران افریقی یونین کو G20 کی مستقل رکنیت دی گئی، جو بھارت کے لیے باعثِ فخر ہے۔

موجودہ عالمی نظام میں بڑی تیزی سے آ رہی ہے تبدیلی: پی ایم مودی

انھوں نے مزید کہا کہ دوسری جنگِ عظیم کے بعد قائم عالمی نظام میں اب بڑی تیزی سے تبدیلی آ رہی ہے۔ ٹیکنالوجی میں انقلابی ترقی، گلوبل ساؤتھ کی ابھرتی ہوئی آواز اور آبادیاتی تبدیلیاں اس رفتار میں اہم کردار ادا کر رہی ہیں۔ وزیر اعظم نے بھارت اور گھانا کے تاریخی تعلقات اور آزادی کی جدوجہد میں یکجہتی کو بھی یاد کیا۔ انھوں نے گھانا کے صدر اور عوام کا شکریہ ادا کیا، جنھوں نے انھیں گھانا کے اعلیٰ ترین قومی اعزاز سے نوازا۔ اس دوران گھانا کی پارلیمنٹ میں کچھ اراکین نے بھارتی روایتی لباس میں شرکت کی، جسے پی ایم مودی نے خوش آئند قرار دیا۔

واضح رہے کہ یہ کسی بھی بھارتی وزیر اعظم کا 30 سال بعد گھانا کا دورہ تھا۔ اس کے علاوہ یہ گھانا کی پارلیمنٹ سے کسی بھی بھارتی وزیر اعظم کا پہلا خطاب تھا۔ بعد ازاں پی ایم مودی گھانا سے رخصت ہو کر اپنے پانچ ملکی دورے کے دوسرے مرحلے کے تحت ٹرینیڈاڈ و ٹوباگو کے لیے روانہ ہو گئے ہیں۔

بھارت ایکسپریس اردو