ڈاکٹر شمس اقبال نے قومی اردو کونسل کے ڈائرکٹر کا چارج سنبھالا۔
نئی دہلی: قومی کونسل برائے فروغ اردو زبان کے نئے ڈائرکٹر کے طورپر آج ڈاکٹر شمس اقبال نے چارج سنبھال لیا۔ اس موقع پرایک استقبالیہ تقریب کا اہتمام کیا گیا، جس میں رخصت پذیر ڈائریکٹرپروفیسردھننجے سنگھ نے ڈاکٹر شمس اقبال کو چارج سونپتے ہوئے گلدستہ پیش کرکے ان کا استقبال کیا اوراپنے استقبالیہ کلمات میں کہا کہ کونسل کے ڈائریکٹرکی حیثیت سے میرے 8-7 مہینے بہت یادگار تھے، نئے ڈائرکٹرکے طورپرڈاکٹرشمس اقبال کا میں تہہ دل سے استقبال کرتاہوں اورمیں سمجھتا ہوں کہ کونسل جیسے اردو کے مرکزی ادارے کے لئے شمس اقبال سے بہترانتخاب نہیں ہوسکتا تھا۔
پروفیسردھننجے سنگھ نے کہا کہ ڈاکٹرشمس اقبال برسوں سے حکومتِ ہند کے اہم ترین ادارے نیشنل بک ٹرسٹ (این بی ٹی) میں ایڈیٹرکی حیثیت سے خدمات انجام دیتے رہے ہیں اوراس عرصے میں انھوں نے اردو زبان کے فروغ اوراردو کتابوں کی اشاعت کے سلسلے میں قابلِ قدرکارنامے انجام دیئے ہیں۔ مجھے امید ہے کہ ان کی سربراہی میں کونسل ترقیات کی نئی منزلیں طے کرے گی۔
ڈاکٹرشمس اقبال نے اظہارِ خیال کرتے ہوئے کہا کہ میں حکومتِ ہند اوروزارتِ تعلیم کا شکریہ ادا کرتا ہوں کہ انھوں نے قومی اردو کونسل جیسے اردو کے اہم ادارے کی ذمے داری مجھے سونپی۔ انہوں نے کہا کہ کونسل محض ایک ادارہ نہیں ہے، بلکہ قومی سطح پرشرحِ خواندگی کو بڑھانے اورکتاب کلچر کے فروغ میں کونسل کا اہم کردارہے۔ انہوں نے کہا کہ میری کوشش ہوگی کہ کونسل کی باوقارشناخت کو مزید مستحکم کیا جائے اوراس کے ذریعہ چلائی جارہی فروغ اردوکی اسکیموں کو دوردرازتک پہنچایا جائے۔
واضح رہے کہ ڈاکٹرشمس اقبال اس سے قبل این بی ٹی میں ایڈیٹررہ چکے ہیں۔ قومی اردو کونسل میں بحیثیت پرنسپل پبلیکیشن آفیسربھی اپنی ذمہ داریاں نبھا چکے ہیں اورطویل انتظامی تجربات رکھتے ہیں۔ اس موقع پرکونسل کا تمام اسٹاف موجود رہا اوراسسٹنٹ ڈائریکٹرمحمد احمد کے اظہارِ تشکرکے ساتھ استقبالیہ تقریب کا اختتام ہوا۔
بھارت ایکسپریس۔
