ملک میں بڑھتے ہوئے ڈجیٹل اریسٹ فراڈ کے معاملات کے درمیان مرکزی حکومت نے سپریم کورٹ میں اپنی اسٹیٹس رپورٹ داخل کر دی ہے۔ ڈیجیٹل اریسٹ کے بڑھتے واقعات پر سپریم کورٹ نے ازخود نوٹس لیا تھا۔ عدالت کی ہدایات کے مطابق دہلی پولیس کی ایف آئی آر کو سی بی آئی کے حوالے کر دیا گیا ہے اور ایجنسی نے اس معاملے میں نئی ایف آئی آر درج کر کے جانچ شروع کر دی ہے۔
ہائی لیول کمیٹی کا قیام
یہ تمام کارروائی اس وقت سامنے آئی ہے جب دہلی کے گریٹر کیلاش میں رہنے والے این آر آئی ڈاکٹر جوڑے کے ساتھ ویڈیو کال کے ذریعے ڈجیٹل اریسٹ کر کے 14.85 کروڑ روپے کی دھوکہ دہی کا سنسنی خیز معاملہ منظرِ عام پر آیا۔ مرکزی حکومت نے سپریم کورٹ کو آگاہ کیا ہے کہ وزارتِ داخلہ نے ڈجیٹل اریسٹ کے مسئلے سے نمٹنے کے لیے ایک ہائی لیول بین محکمانہ کمیٹی تشکیل دی ہے۔
کمیٹی میں کیا ہوگا خاص؟
مرکزی حکومت کی جانب سے داخل کی گئی اسٹیٹس رپورٹ میں بتایا گیا ہے کہ وزارتِ داخلہ نے ملک میں ڈجیٹل اریسٹ کے مسئلے کے تمام پہلوؤں کا باریک بینی سے جائزہ لینے کے لیے ایک اعلیٰ سطحی انٹر ڈپارٹمنٹل کمیٹی بنائی ہے۔ اس کمیٹی کی صدارت وزارتِ داخلہ کے اسپیشل سکریٹری (اندرونی سلامتی) کر رہے ہیں۔ کمیٹی کے اراکین میں الیکٹرانکس و انفارمیشن ٹیکنالوجی کی وزارت (MeitY)، محکمۂ ٹیلی کمیونی کیشن (DoT)، وزارتِ خارجہ (MEA)، محکمۂ مالی خدمات، وزارتِ قانون و انصاف، وزارتِ امورِ صارفین، ریزرو بینک آف انڈیا کے جوائنٹ سکریٹری سطح کے افسران، سی بی آئی، این آئی اے، دہلی پولیس کے آئی جی رینک کے افسران اور انڈین سائبر کرائم کوآرڈی نیشن سینٹر (I4C) کے ممبر سکریٹری شامل ہیں۔
حکومت نے وقت مانگا
رپورٹ کے مطابق کمیٹی کی پہلی میٹنگ 29 دسمبر کو ہوئی، جس میں سپریم کورٹ کی ہدایات اور ایمیکس کیوری کے مشوروں پر تفصیلی غور و خوض کیا گیا۔ اس کے بعد 2 جنوری کو ایمیکس کیوری کے ساتھ ایک خصوصی میٹنگ بھی منعقد کی گئی، جس میں محکمۂ ٹیلی کمیونی کیشن، الیکٹرانکس و انفارمیشن ٹیکنالوجی کی وزارت، آر بی آئی اور انڈین سائبر کرائم کوآرڈی نیشن سینٹر (I4C) کے نمائندے شامل تھے۔ مرکزی حکومت نے سپریم کورٹ سے گزارش کی ہے کہ تمام متعلقہ محکموں سے تجاویز حاصل کر کے ایک مضبوط اور جامع حکمتِ عملی تیار کرنے کے لیے اسے کم از کم ایک ماہ کا وقت دیا جائے، تاکہ ڈجیٹل اریسٹ جیسے سنگین مسئلے سے مؤثر انداز میں نمٹا جا سکے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
