چمپائی سورین آج جھارکھنڈ مکتی مورچہ اور کابینی وزیر عہدے سے استعفیٰ دیں گے۔ (فائل فوٹو)
جھارکھنڈ کے سابق وزیراعلیٰ چمپائی سورین نے کہا کہ وہ جھارکھنڈ مکتی مورچہ (جے ایم ایم) اورجھارکھنڈ کی کابینہ سے آج (28 اگست) کواستعفیٰ دیں گے۔ 30 اگست کوباضابطہ طورپربی جے پی میں شامل ہونے والے ہیں۔ استعفیٰ سے پہلے انہوں نے رانچی میں میڈیا سے بات چیت میں کہا کہ ”جوبھی فیصلہ ہم نے لیا ہے، وہ جھارکھنڈ کے مفاد میں لیا ہے۔ آگے ہم بتاتے جائیں گے۔ ہم جدوجہد سے نکلے ہوئے شخص ہیں۔ کسی حالات سے گھبراتے نہیں ہیں۔ آج ہم استعفیٰ دیں گے۔”
چمپائی سورین گزشتہ ماہ جھارکھنڈ کے تین روزہ دورے پرتھے تویہ مانا جا رہا تھا کہ وہ جے ایم ایم کے کچھ اراکین اسمبلی کے ساتھ بی جے پی میں شامل ہوں گے، لیکن تب انہوں نے اس سے انکارکرتے ہوئے کہا تھا کہ وہ ذاتی کام سے دہلی آئے ہیں۔ حالانکہ کچھ دنوں کے بعد ان کی وزیرداخلہ امت شاہ کے ساتھ میٹنگ کی تصویرسوشل میڈیا پرآئی اورآسام کے وزیراعلیٰ ہیمنتا بسوا سرما نے تصدیق کردی کہ چمپائی سورین بی جے پی میں شامل ہونے جا رہے ہیں۔
Ranchi: Former CM Champai Soren, on his resignation from JMM, says, “All the decisions I have made are in the best interest of Jharkhand…” pic.twitter.com/B5MbH3fWii
— IANS (@ians_india) August 28, 2024
ہیمنت سورین کے جیل جانے پروزیراعلیٰ بنے تھے چمپائی سورین
واضح رہے کہ جھارکھنڈ میں جنوری سے لے کراب تک سیاسی حادثات میں کافی تیزی سے تبدیلی آئی ہے، جب 31 جنوری کو وزیراعلیٰ ہیمنت سورین کو ای ڈی نے گرفتارکیا تھا اورانہوں نے گرفتاری سے پہلے استعفیٰ دے دیا تھا۔ اس کے بعد چمپائی سورین کا نام وزیراعلیٰ عہدے کے لئے منتخب کیا گیا۔ چمپائی سورین نے 2 فروری 2024 کو وزیراعلیٰ عہدے کا حلف لیا تھا۔
ہیمنت سورین کے جیل سے نکلنے پر چمپائی نے دیا استعفیٰ
جون کے مہینے میں ہیمنت سورین کوجھارکھنڈ ہائی کورٹ نے منی لانڈرنگ معاملے میں ضمانت دے دی، جس کے بعد انہیں 28 جون کو ضمانت پررہا کردیا گیا تھا۔ اس کے بعد چمپائی سورین کو وزیراعلیٰ عہدے سے استعفیٰ دینا پڑا اورپھر4 جون کو ہیمنت سورین نے پھر ریاست کی کمان سنبھالتے ہوئے وزیراعلیٰ عہدے کا حلف لیا۔ چمپائی سورین پانچ ماہ تک جھارکھنڈ کے وزیراعلیٰ رہے۔ انہوں نے سوشل میڈیا پوسٹ پراس سے متعلق بعد میں ناراضگی بھی ظاہرکی تھی اورالزام لگایا تھا کہ ان کی توہین کی گئی ہے۔
بھارت ایکسپریس–
