پٹنہ: بہار کی سیاست میں یادو خاندان کے اندرونی اختلاف ایک بار پھر سرخیوں میں ہیں۔ راشٹریہ جنتا دل (آر جے ڈی) کے سربراہ لالو پرساد یادو کے بڑے بیٹے تیج پرتاپ یادو نے اپنے چھوٹے بھائی اور مہاگٹھ بندھن کے وزیراعلیٰ امیدوار تیجسوی یادو پر شدید تنقید کی ہے۔ انہوں نے کہا کہ ”اعلانات سب کرتے ہیں، لیکن اقتدار کی کرسی پر بیٹھنے کے بعد انسان میں لالچ پیدا ہو ہی جاتا ہے“۔
مہوا میں انتخابی مہم کے دوران بیان
مہوا اسمبلی حلقے سے آر جے ڈی امیدوار تیج پرتاپ یادو موٹر سائیکل پر انتخابی مہم چلا رہے تھے۔ اسی دوران میڈیا سے گفتگو میں انہوں نے کہا کہ مہوا کی سڑکیں خستہ حال ہیں اور عوام شدید پریشانی میں ہیں۔ تیج پرتاپ نے دعویٰ کیا کہ انہوں نے علاقے میں میڈیکل کالج قائم کرایا اور اگر عوام موقع دیں گے تو وہ سڑکوں اور بنیادی سہولیات کی تعمیر پر بھی توجہ دیں گے۔
”وزیراعلیٰ کون بنے گا، یہ عوام طے کرے گی“
تیجسوی یادو اور مکیش سہنی کو وزیر اعلیٰ اور نائب وزیر اعلیٰ کے امیدوار کے طور پر پیش کیے جانے پر سوال اٹھاتے ہوئے تیج پرتاپ نے کہا کہ ”یہ فیصلہ عوام کا ہے۔ جس کے پاس عوامی طاقت ہوگی، وہی وزیر اعلیٰ بنے گا۔ نوجوانوں کو روزگار چاہیے، عوام مسائل سے تنگ آ چکی ہے“۔
پارٹی امیدواروں پر بھی الزام
تیج پرتاپ یادو نے اپنی ہی پارٹی کے موجودہ ایم ایل اے پر بھی حملہ کیا۔ ان کا کہنا تھا کہ موجودہ ایم ایل اے نے مہوا میں کوئی ترقیاتی کام نہیں کیا اور عوام کو صرف دھوکہ دیا۔ انہوں نے تیجسوی یادو پر الزام لگایا کہ وہ ”فرضی اور موقع پرست لوگوں کو ٹکٹ دے رہے ہیں“۔
”اعلانات کرنا آسان، وعدے نبھانا مشکل“
تیج پرتاپ نے اپنے بھائی کے انتخابی وعدوں کو نشانہ بناتے ہوئے کہا کہ ”اعلانات تو سب کرتے ہیں، مگر اقتدار میں آنے کے بعد لالچ آہی جاتا ہے۔ عوام سے کیے وعدے پورے کرنا ہی اصل سیاست ہے“۔ انہوں نے کہا کہ ان کے پاس وعدے پورے کرنے کی صلاحیت ہے، جس کی مثال مہوا کا میڈیکل کالج ہے۔ ایک سوال کے جواب میں کہ اگر وہ جیت گئے تو کیا والدین سے آشیرواد لینے جائیں گے؟ تیج پرتاپ نے مسکراتے ہوئے کہا کہ ”ماں باپ کا آشیرواد ہمیشہ ہمارے ساتھ ہے اور مہوا کی عوام کا بھی“۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
