فائل فوٹو
سماج وادی پارٹی کے قومی ترجمان طارق خان کو مبینہ طور پر لارنس بشنوئی گینگ سے وابستہ ایک شخص کی طرف سے دھمکی آمیز کال موصول ہوئی ہے۔ پولیس نے دو دن پہلے آئی اس کال کی تحقیقات شروع کر دی ہے۔ ہفتہ کی شام سوشل میڈیا پر گردش کرنے والے ایک آڈیو کلپ میں سنا جا سکتا ہے کہ طارق خان کو گالی گلوچ کے ساتھ دھمکی بھی دی گئی۔ پی ٹی آئی سے بات کرتے ہوئے طارق خان نے کہا ’’پچھلے دو مہینوں سے مجھے دھمکی آمیز فون آ رہے ہیں جنھیں میں نظرانداز کرتا رہا۔ لیکن جمعہ کی رات فون کرنے والے ایک شخص نے نہ صرف گالی گلوچ کی بلکہ لارنس بشنوئی گینگ کی جانب سے بولنے کا دعویٰ بھی کیا۔ دھمکی کی سنگین نوعیت کے مدنظر میں نے فوری طور پر سپرنٹنڈنٹ آف پولیس اور پارٹی سربراہ اکھلیش یادو کو اس کی اطلاع دی۔‘‘
طارق خان نے مزید کہا ’’میں نے پولیس کو مطلع کیا ہے کہ یہ ایک دھوکہ ہوسکتا ہے، لیکن کال کرنے والے کی شناخت کرنا اور اسے پکڑنا ضروری ہے۔ میں نے پولیس کو سابقہ واقعات کے ساتھ حالیہ گفتگو کی ریکارڈنگ بھی فراہم کی ہے۔‘‘ وہیں پارٹی کے قومی صدر اکھلیش یادو نے طارق خان کو منگل کے روز لکھنؤ بلایا ہے۔ اگر ضروری سمجھا گیا تو اکھلیش یادو اس معاملے کو ڈائریکٹر جنرل آف پولیس تک لے جا سکتے ہیں۔
فون پر کیا کہہ رہا تھا انجان کالر؟
مبینہ آڈیو ریکارڈنگ میں فون کرنے والا شخص باربار خان کو دھمکی دیتا ہوا سنا جا سکتا ہے۔ وہ کہتا ہے کہ ’’محتاط رہو ورنہ اگلا نمبر تمھارا ہوگا‘‘ یا ’’سوچ سمجھ کر بات کرو‘‘، ’’تمھارا نمبر آ رہا ہے‘‘ جیسے جملے بول رہا ہے۔ جب خان نے فون کرنے والے سے لارنس بشنوئی کے بارے میں پوچھا تو اس نے جارحانہ انداز میں جواب دیا ’’تمہیں جلد پتہ چل جائے گا۔ دو تین دن انتظار کرو، میں تمہیں دکھاتا ہوں۔‘‘
دریں اثنا ایڈیشنل سپرنٹنڈنٹ آف پولیس (سٹی) رامانند پرساد نے پی ٹی آئی کو بتایا ’’یہ کال واقعی بشنوئی گینگ کی طرف سے یا کسی اور کی طرف سے، اس کی تصدیق نہیں ہو سکی ہے۔ تاہم ہم اس معاملے کو سنجیدگی سےلے رہی ہیں۔ کال کرنے والے کا نمبر نگرانی میں ہے اور اسے ٹریس کرنے کی کوششیں جاری ہیں۔ اس کی تفتیش کے لیے ڈپٹی سپرنٹنڈنٹ سطح کے پولیس افسر کو مقرر کیا گیا ہے۔‘‘
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
