اعظم خان کی فیملی کو عدالت سے بڑی راحت ملی ہے۔
سماجوادی پارٹی کے سینئرلیڈراعظم خان کی فیملی کو دشمن کی جائیداد معاملے میں جمعرات کوعدالت سے بڑی راحت ملی ہے۔ رام پور کی ایک خصوصی عدالت نے سابق رکن پارلیمنٹ کی بیوی اوربیٹے سمیت فیملی کے تین اراکین کومستقل ضمانت دے دی ہے۔ اعظم خان کی اہلیہ تزئین فاطمہ، ان کے بڑے بیٹے ادیب اعظم خان اورا ن کی بہن نکہت اخلاق پہلے عبوری ضمانت پرتھے اوراب انہیں عدالت سے مستقل ضمانت مل گئی ہے۔
اعظم خان کی فیملی اپنی مستقل ضمانت عرضیوں پرسماعت کے لئے رام پور میں ایم پی-ایم ایل اے خصوصی عدالت کے سامنے پیش ہوئے۔ اعظم خان کی فیملی کے وکیل ونود شرما نے بتایا کہ اعظم خان کی اہلیہ تزئین فاطمہ، بڑے بیٹے ادیب اعظم خان اور بہن نکہت اخلاق آج عدالت میں پیش ہوئے اورانہیں مستقل ضمانت دے دی گئی۔ اس کے علاوہ انہوں نے مزید تفصیلات دینے سے انکارکردیا۔
کورٹ سے صرف تین لوگوں کو ہی ملی ضمانت: وکیل
عدالت کے فیصلے کے بعد فیملی کے اراکین نے میڈیا سے بات چیت میں عدالت کے اس فیصلے پر تبصرہ کرنے سے انکارکردیا۔ وہیں، وکیل ونود شرما نے بھی معاملے کے بارے میں مزید جانکاری دینے سے انکار کردیا۔ حالانکہ انہوں نے دعویٰ کیا کہ اس معاملے میں کئی لوگ ملزم ہیں، لیکن عدالت نے صرف تین لوگوں کو ہی ضمانت دی ہے۔
واضح رہے کہ سال 2017 سے لے کراب تک اعظم خان اوران کے خاندان کے خلاف قبضہ سے لے کرچوری تک کے تقریباً 100 معاملے درج کئے گئے ہیں۔ فیملی کے سبھی اراکین کئی معاملوں میں ضمانت پر باہر ہیں۔ وہیں، اعظم خان گزشتہ 9 ماہ سے سیتا پور جیل میں بند ہیں۔ اعظم خان کی فیملی پردشمن کی جائیداد ہتھیانے سے متعلق معاملے میں 2020 میں مقدمہ درج کیا گیا تھا۔ یہ معاملہ مولانا محمد علی جوہریونیورسٹی سے متعلق جڑا ہوا ہے۔
گزشتہ ماہ عبداللہ اعظم کو ملی تھی ضمانت
اس سے پہلے 18 فروری 2025 کو دشمن کی جائیداد ہتھیانے کے الزام سے متعلق اعظم خان کے چھوٹے بیٹے عبداللہ اعظم خان کو ضمانت ملی تھی۔ اسی معاملے میں اب رام پورخصوصی عدالت مجسٹریٹ ٹرائل جج شوبھت بنسل نے اعظم خان کی اہلیہ ڈاکٹر تزئین فاطمہ، بڑے بیٹے ادیب اعظم خان اور بہن نکہت اخلاق کی ضمانت عرضی منظورکرلی۔ اعظم خان کی فیملی پر دشمن کی جائیداد ہتھیانے کے کاغذات خرد برد کرنے کا الزام ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
