سماجوادی پارٹی کے ٹکٹ پر یوپی کی غازی پور لوک سبھا سیٹ سے الیکشن جیتنے والے افضال انصاری نے بی جے پی کی مایوس کن کارکردگی پر بیان دیا ہے۔ انہوں نے کہا کہ بھگوان رام کے غضب کی وجہ سے بی جے پی نے ایودھیا اور چترکوٹ سیٹیں گنوائیں۔ ساتھ ہی افضال نے اپنے اس بیان کی بھی وضاحت کی جس میں انہوں نے کہا تھا کہ اتر پردیش میں بی جے پی کو جو سیٹیں ملی ہیں وہ سی ایم یوگی کی وجہ سے ہیں۔افضال انصاری نے کہا کہ مودی کا جادو ختم ہوگیاہے، یوگی نے آکر مورچہ سنبھالاہے، میرا یہ بیان منطق پر مبنی تھا۔ اگر کوئی سمجھے تو جان لے کہ میری یوگی سے کوئی گٹھ جوڑ یا میل بھگت نہیں ہے اور نہ مستقبل میں کوئی امید ہے۔ مودی جی کو جتوانے کے لیے، سی ایم یوگی نے بنارس میں ‘ہنومان گیئر’ لگایا۔ دراصل، افضال کا اشارہ باہوبلی ڈان برجیش سنگھ کی طرف تھا۔
ایس پی کے نو منتخب رکن اسمبلی افضال انصاری نے کہا کہ میں نے یوگی کی تعریف نہیں کی بلکہ حقیقت کا اظہار کیاہے۔ اب چاہے کوئی اسے یوگی کی تعریف سمجھے یا کچھ اور، میں کچھ نہیں کر سکتا۔افضال نے مزید کہا کہ مختار انصاری کی موت کا کیس ابھی سپریم کورٹ میں زیرسماعت ہے۔ ضرورت پڑی تو ایوان بالا میں بھی لے جاؤں گا۔ ساتھ ہی، اپنی سزا کے خلاف ہائی کورٹ میں جاری کیس پر، انہوں نے کہا کہ جو رہنما خطوط 17ویں لوک سبھا کے لیے تھے، وہ 18ویں پر لاگو نہیں ہوتے ہیں۔ ہاں اگر فیصلہ میرے حق میں نہ ہوا تو میں اسے دل سے قبول کروں گا۔ ملک میں قانون کی حکمرانی ہے۔
افضال انصاری نے کہا کہ میری جیت کے دوران میری بیٹیاں کارکنوں کی طرح میرے ساتھ تھیں، وہ پڑھی لکھی ہیں اور انہوں نے مشکل کی گھڑی میں میرا ساتھ دیا۔ ساتھ ہی مختار کے بیٹے عباس انصاری کی پیرول پر رہائی پر انہوں نے کہا کہ اس بار پچھلی بار کی طرح سختی نہیں کی گئی۔افضال نے کہا کہ اکھلیش یادو دہلی (لوک سبھا) جاتے ہیں تو بھی ہماری پوری توجہ 2027 کے اسمبلی انتخابات پر ہے۔ اکھلیش یوپی سے دہلی بھی چلائیں گے۔واضح رہے کہ حال ہی میں افضال نے ایک بیان میں کہا تھا کہ سی ایم یوگی کی وجہ سے بی جے پی کو اتر پردیش میں 30 سیٹیں ملی ہیں، اگر وہ محنت نہ کرتے تو یہ تعداد اور بھی کم ہو جاتی۔ افضال نے کہا تھا کہ پی ایم مودی کا جادو ختم ہو گیا ہے۔ یوپی میں یوگی آدتیہ ناتھ نے بی جے پی کو سنبھالاہے۔
بھارت ایکسپریس۔
