تل ابیب: اسرائیل کے سرکاری دورے پر موجود بھارت کے وزیر اعظم نریندر مودی کے اعزاز میں اسرائیلی وزیر اعظم نتن یاہو کی جانب سے دیے گئے خصوصی عشائیے نے سفارتی حلقوں میں خاص توجہ حاصل کرلی، جب نتن یاہو نے بھارتی روایتی لباس پہن کر مہمان وزیر اعظم کا استقبال کیا۔ وزیر اعظم مودی نے اس اقدام کو بھارتی ثقافت اور روایات کے تئیں احترام کا خوبصورت اظہار قرار دیا۔ تفصیلات کے مطابق عشائیے کے دوران اسرائیلی وزیر اعظم ہلکے سرمئی رنگ کی نہرو جیکٹ میں نظر آئے اور مسکراتے ہوئے وزیر اعظم مودی کا خیر مقدم کیا۔ اس موقع پر دونوں لیڈروں کے درمیان خوشگوار ماحول دیکھنے کو ملا، جسے دونوں ممالک کی مضبوط دوستی کی علامت قرار دیا جا رہا ہے۔
बहुत ही शानदार!
भारतीय परिधान के प्रति आपका ये लगाव हमारे देश की समृद्ध संस्कृति और परंपराओं के प्रति आपके सम्मान को दर्शाता है। @netanyahu https://t.co/YxbNVqwyTi
— Narendra Modi (@narendramodi) February 26, 2026
بعد ازاں سوشل میڈیا پلیٹ فارم ’’ایکس‘‘ پر نتن یاہو کی جانب سے شیئر کی گئی ویڈیو کا جواب دیتے ہوئے وزیر اعظم مودی نے کہا کہ بھارتی لباس کے لیے ان کی دلچسپی بھارت کی قدیم اور متنوع تہذیب کے لیے گہرے احترام کی عکاسی کرتی ہے۔ انہوں نے اپنے پیغام میں لکھا کہ یہ اقدام دونوں ممالک کے درمیان ثقافتی قربت اور باہمی اعتماد کو مزید مستحکم کرتا ہے۔ اسرائیلی وزیر اعظم نے اپنی پوسٹ میں بتایا کہ مشترکہ عشائیے سے قبل انہوں نے اپنے دوست وزیر اعظم مودی کو روایتی بھارتی لباس پہن کر حیران کرنے کی کوشش کی۔ ویڈیو میں وزیر اعظم مودی کو مسکراتے ہوئے یہ کہتے سنا گیا کہ ’’یہ ایک بھارتی ڈریس ہے‘‘، جس پر دونوں لیڈر خوشگوار انداز میں گفتگو کرتے دکھائی دیے۔
وزیر اعظم مودی کے دورۂ اسرائیل کے دوران سفارتی روابط کے ساتھ ساتھ ’’کار ڈپلومیسی‘‘ کی جھلک بھی دیکھنے کو ملی، جب دونوں وزرائے اعظم ایک ہی گاڑی میں سفر کرتے ہوئے نظر آئے۔ اس تصویر کو بھی سوشل میڈیا پر بڑی تعداد میں شیئر کیا گیا اور اسے دونوں لیڈروں کے قریبی ذاتی تعلقات کی علامت قرار دیا گیا۔ اسی دوران اسرائیلی پارلیمنٹ میں وزیر اعظم مودی کو ملک کے اعلیٰ اعزاز سے بھی نوازا گیا، جہاں ارکان پارلیمنٹ نے کھڑے ہو کر ان کا استقبال کیا۔ خطاب کے بعد متعدد اسرائیلی قانون ساز ان سے ملاقات اور تصاویر لینے کے لیے قطار میں کھڑے نظر آئے، جس کی ویڈیوز عالمی سطح پر وائرل ہو گئیں۔
हम साथ आगे बढ़ रहे हैं-और तकनीक व नवाचार में भारत-इज़राइल साझेदारी को और मजबूत बना रहे हैं। 🇮🇳🇮🇱 https://t.co/xP5SrAYNe4
— Benjamin Netanyahu – בנימין נתניהו (@netanyahu) February 25, 2026
پارلیمنٹ سے خطاب کے دوران نتن یاہو نے مشہور ’’مودی ہگ‘‘ کا بھی ذکر کیا اور کہا کہ وزیر اعظم مودی کا گرمجوشی سے گلے لگانا دنیا بھر میں معروف ہو چکا ہے۔ ان کے مطابق یہ محض ذاتی دوستی نہیں بلکہ بھارت اور اسرائیل کے عوام کے درمیان مضبوط تعلقات اور اعتماد کی حقیقی علامت ہے۔ نتن یاہو نے مزید کہا کہ بھارت ایک بڑی عالمی طاقت ہے، جبکہ اسرائیل جغرافیائی طور پر چھوٹا ہونے کے باوجود عزم، اختراع اور کامیابی کے جذبے میں کسی سے کم نہیں۔ مبصرین کے مطابق یہ ثقافتی اور سفارتی لمحہ دونوں ممالک کے تعلقات میں نئی گرمجوشی اور قربت کی عکاسی کرتا ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
