صدرِ جمہوریہ کے دفتر کی جانب سے سوشل میڈیا پلیٹ فارم ایکس پر جاری بیان میں کہا گیا کہ نانا پاٹیکر کی پُراثر اور دل کو چھو لینے والی اداکاری نے انسانی تجربات کے مختلف پہلوؤں کو حقیقت کے قریب پیش کیا۔ انہوں نے ایسے کردار نبھائے جنہوں نے ناظرین کے دلوں اور ذہنوں پر گہری چھاپ چھوڑی۔ بیان کے مطابق معاشرے کی خدمت اور محروم طبقات کے لیے ان کی فکر بھی ان کی شخصیت کا اہم پہلو تھی۔
نائب صدر سی پی رادھا کرشنن نے بھی نانا پاٹیکر کو خراجِ عقیدت پیش کرتے ہوئے کہا کہ ایک ہمہ جہت اور غیر معمولی باصلاحیت فنکار کی حیثیت سے انہوں نے اپنے ہر کردار میں گہرائی، حساسیت اور حقیقت پسندی پیدا کی۔ بھارتی سنیما میں ان کی گراں قدر خدمات کو ہمیشہ یاد رکھا جائے گا اور ان کی اداکاری آنے والی نسلوں کے فلم شائقین کو متاثر کرتی رہے گی۔
اطلاعات کے مطابق نانا پاٹیکر جمعرات کی صبح 75 برس کی عمر میں انتقال کر گئے۔ انہیں گوا کے ڈونا پاؤلا میں واقع ان کی رہائش گاہ پر بے ہوشی کی حالت میں پایا گیا، جس کے بعد فوری طور پر اسپتال منتقل کیا گیا، جہاں ڈاکٹروں نے انہیں مردہ قرار دے دیا۔گوا کے منی پال اسپتال کے شعبۂ آنکولوجی کے سربراہ ڈاکٹر شیکھر سالکر نے آئی اے این ایس کو بتایا کہ نانا پاٹیکر کو جمعرات کی صبح تقریباً 4 بج کر 20 منٹ سے 4 بج کر 35 منٹ کے درمیان اسپتال لایا گیا۔ ان کی حالت دیکھتے ہوئے طبی ٹیم نے سی پی آر کی کوشش کی۔ ڈاکٹر کے مطابق طبی عملہ صبح 4 بج کر 18 منٹ پر ان کے گھر پہنچ گیا تھا اور وہیں سے سی پی آر شروع کر دیا گیا تھا، تاہم اسپتال پہنچنے تک ان کا انتقال ہو چکا تھا۔ نانا پاٹیکر اداکار ہونے کے ساتھ ساتھ مصنف، فلم ساز اور ہدایت کار بھی تھے۔ انہوں نے 1978 میں ڈرامہ فلم ’گمن‘ سے ہندی سنیما میں قدم رکھا۔ بعد ازاں انہوں نے مراٹھی فلموں میں بھی کام کیا۔ 1989 میں فلم ’پرندہ‘ کے ذریعے ہندی سنیما میں نمایاں واپسی کی، جس میں انہوں نے ایک گینگسٹر کا منفی کردار ادا کیا تھا۔ 1994 میں نانا پاٹیکر نے فلم ’پراہار: دی فائنل اٹیک‘ کے ذریعے ہدایت کاری کے میدان میں بھی قدم رکھا۔ بھارتی سنیما میں ان کی طویل فنی خدمات اور منفرد اداکاری نے انہیں ایک نمایاں مقام دلایا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
