جھارکھنڈ کے Latehar میں جموں توی ایکسپریس میں ڈکیتی، ٹرین میں فائرنگ، خواتین کے ساتھ بدتمیزی، کئی مسافر زخمی
سمبل پور سے جموں توی جانے والی جموں توی ایکسپریس میں ڈکیتی کی واردات ہوئی ہے۔ یہ واقعہ ہفتہ کی دیر رات بارواڈیہ اور لاتیہار(Latehar) اسٹیشن کے درمیان پیش آیا۔ جرائم پیشہ افراد نے ٹرین کے مسافروں سے لاکھوں روپے لوٹ لئے۔ ڈکیتی کے دوران کئی مسافروں کو زدوکوب بھی کیا گیا۔ مار پیٹ میں کئی مسافر زخمی بھی ہوئے۔ مجرموں نے اس واردات کو سمبل پور جموںتوی ایکسپریس S-9 بوگی میں انجام دیا۔ ڈاکو ڈکیتی کے بعد فرار ہو گئے۔ جب ٹرین ڈالتون گنج اسٹیشن پہنچی تو مسافروں نے جم کرہنگامہ کیا۔ اس کی وجہ سے ٹرین تقریباً دو گھنٹے تک ڈالتون گنج میں رکی رہی۔ قابل ذکر بات یہ ہے کہ ڈالتون گنج اسٹیشن پر ہی زخمی مسافروں کو طبی امداد دی گئی جس کے بعد ٹرین روانہ ہوئی ۔
آٹھ سے دس راؤنڈ فائر، دو خول برآمد ہوئے
ڈکیتی کے دوران ملزمان نے آٹھ سے دس راؤنڈ فائرنگ بھی کی۔ پولیس نے سلیپر بوگی S9 سے دو خول بھی برآمد کیے ہیں۔ واقعہ کے بارے میں ریلوے مسافروں کا کہنا تھا کہ جموں توی ایکسپریس کے لاتیہار اسٹیشن سے روانہ ہونے کے بعد مجرموں نے لوٹ مار شروع کردی۔ ٹرین میں سوار تقریباً نصف درجن مجرموں نے لوٹ مار شروع کر دی۔ مجرم 35 سے 40 منٹ تک لوٹ مار کرتے رہے۔ جیسے ہی ٹرین بارواڈیہ اسٹیشن کے قریب رکی، تمام مجرم نیچے اتر کر بھاگ گئے۔ ڈکیتی کے خلاف احتجاج کرنے پر کچھ مسافروں کو شدید مارا پیٹا۔
ڈالتون گنج اسٹیشن پر مسافروں کا ہنگامہ
جب برواڈیہ سے ٹرین ڈالتون گنج اسٹیشن پہنچی تو مسافروں نے ہنگامہ کھڑا کردیا۔مسافروں نے ایف آئی آر کے فوری اندراج کا مطالبہ کیا۔ واقعہ کی اطلاع ملتے ہی اعلیٰ پولیس افسران موقع پر پہنچ گئے اور کارروائی کی یقین دہانی کرائی۔ جس کے بعد ٹرین آگے روانہ ہوئی۔
بھارت ایکسپریس
