Bharat Express DD Free Dish

PM Modi’s appeal to Indian companies: ’’ملازمین کی تعداد اور تنخواہوں میں اضافہ کریں‘‘، وزیراعظم مودی کی بھارتی کمپنیوں سے اپیل

وزیراعظم نے صنعت کاروں سے کہا کہ وہ ملازمین کی تعداد بڑھانے کے ساتھ ان کی تنخواہوں میں بھی اضافہ کریں اور ان کی فلاح و بہبود کو ترجیح دیں۔ انہوں نے کہا کہ حکومت کاروبار کو آسان بنانے کے لیے مسلسل اصلاحات کر رہی ہے۔ صنعت سے 2047 تک ترقی یافتہ بھارت کے ہدف میں اپنا کردار ادا کرنے کی بھی وزیراعظم نے اپیل کی ہے۔

نئی دہلی: وزیراعظم نریندر مودی نے جمعرات کو بھارتی کمپنیوں سے اپیل کی کہ وہ ملازمین کی فلاح و بہبود پر توجہ دیتے ہوئے ان کی تعداد اور تنخواہوں میں اضافہ کریں۔ انہوں نے کہا کہ ملک میں کاروبار کو آسان بنانے کے لیے حکومت مسلسل اقدامات کر رہی ہے اور صنعت کو بھی ملازمین کی بہتری کے لیے کام کرنا چاہیے۔ قومی راجدھانی میں فیڈریشن آف انڈین چیمبرز آف کامرس اینڈ انڈسٹری (فکی) کی سالانہ عام میٹنگ اور کانفرنس سے خطاب کرتے ہوئے وزیراعظم نے کہا کہ حکومت کی پوری توجہ کاروبار کو آسان بنانے پر رہی ہے۔ سال 2014 میں کارپوریٹ ٹیکس کی شرح 30 فیصد تھی، جسے کم کرکے 22 فیصد کر دیا گیا ہے۔ انہوں نے کہا کہ آج بھارت میں 12 لاکھ روپے تک کی آمدنی پر کوئی انکم ٹیکس نہیں ہے۔

’یہ پرانی حکومت نہیں، دوست حکومت ہے‘

وزیر اعظم نے صنعت کاروں سے کہا کہ وہ ملازمین کی تعداد بڑھانے کے ساتھ ان کی تنخواہوں میں بھی اضافہ کریں اور ان کی فلاح و بہبود کو ترجیح دیں۔ انہوں نے کہا کہ ملک جب ’ریفارم ایکسپریس‘ پر آگے بڑھ رہا ہے تو حکومت بھی صنعت کے ساتھ قدم سے قدم ملا کر چلنے کے لیے تیار ہے۔ انہوں نے کہا کہ ماضی کی حکومتوں کے ساتھ صنعت کے تجربات اتنے تلخ رہے ہیں کہ اس کا خمیازہ انہیں بھی بھگتنا پڑ رہا ہے۔ مودی نے کہا، ’’یہ پرانی حکومت نہیں ہے، یہ دوست حکومت ہے۔ یہ دوستی نبھانا جانتی ہے اور آپ میرے سچے دوست ہیں۔ اس لیے بلا جھجھک اور بغیر کسی ہچکچاہٹ کے مجھے کھل کر لکھ کر بھیجیں کہ اب بھی کن اصلاحات کی ضرورت ہے۔‘‘

صنعت اگلے 20 برسوں کے اہداف طے کرے

وزیر اعظم نے کہا کہ آگے بڑھنے کے لیے وقتاً فوقتاً خود احتسابی ضروری ہے۔ یہ اصول نہ صرف کسی فرد بلکہ صنعت اور ملک پر بھی لاگو ہوتا ہے۔ صنعت کو بھی اپنا جائزہ لیتے ہوئے طے کرنا چاہیے کہ آئندہ 20 برسوں میں اسے کیا حاصل کرنا ہے اور 2047 تک ترقی یافتہ بھارت کے ہدف میں وہ کس طرح اپنا تعاون دے سکتی ہے۔

دواسازی اور معدنیات کے شعبے میں خود کفالت پر زور

مودی نے کہا کہ موجودہ دور میں وسائل کو ہتھیار کے طور پر استعمال کیا جا رہا ہے، ایسے میں صنعت کو ان شعبوں میں آگے بڑھنا چاہیے جن کی مانگ قومی اور بین الاقوامی دونوں سطحوں پر موجود ہو۔ دواسازی کی صنعت کی مثال دیتے ہوئے انہوں نے کہا کہ بھارت کو دنیا کی فارمیسی کہا جاتا ہے، لیکن اس کے باوجود ملک آج بھی فعال دواسازی اجزا (اے پی آئی) اور انٹرمیڈیٹس کی اربوں ڈالر مالیت کی درآمد کرتا ہے۔ صنعت کو اس بات پر غور کرنا چاہیے کہ ان میں سے کن چیزوں کی تیاری ملک کے اندر ممکن ہے۔ انہوں نے کہا کہ کئی دیگر شعبوں میں بھی ایسی ہی صورت حال ہے اور بھارت کو معدنیات کے شعبے میں بھی مہارت حاصل کرنے کی ضرورت ہے۔

بھارت ایکسپریس اردو۔



بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔

Also Read