نئی دہلی: ملازمین کے پروویڈنٹ فنڈ سے متعلق ادارے ای پی ایف او (امپلائز پروویڈنٹ فنڈ آرگنائزیشن) نے جمعرات کو اپنے کروڑوں ارکان کو بڑی راحت دیتے ہوئے 55 سال تک کی عمر کے ارکان کے لیے پی ایف اکاؤنٹ سے رقم نکالنے کی حد بڑھا کر 90 فیصد کر دی ہے۔ اس سے پہلے ارکان اپنے جمع شدہ فنڈ کا زیادہ سے زیادہ 75 فیصد ہی نکال سکتے تھے۔ اس فیصلے سے ضرورت کے وقت ملازمین کو زیادہ مالی سہولت اور لچک حاصل ہوگی۔
ملازمت چھوٹنے پر صرف 2 ماہ انتظار کرنا ہوگا
ای پی ایف او نے ملازمت چھوٹنے کے بعد پی ایف کی رقم نکالنے کے لیے انتظار کی مدت بھی 12 ماہ سے کم کرکے صرف 2 ماہ کرنے کا فیصلہ کیا ہے۔ اس اقدام سے بے روزگاری کی صورت میں ملازمین کو مالی مشکلات سے راحت ملنے اور اپنی جمع پونجی تک جلد رسائی حاصل کرنے میں مدد ملے گی۔ ان اہم اصلاحات کو ای پی ایف او کے مرکزی بورڈ آف ٹرسٹیز (سی بی ٹی) نے منظوری دی ہے۔ بورڈ نے اس کے ساتھ ہی سسٹمیٹک وِدڈرال پلان (ایس ڈبلیو پی) شروع کرنے کی تجویز کو بھی منظوری دے دی ہے، جسے ریٹائرڈ ملازمین کے لیے ایک اہم تبدیلی قرار دیا جا رہا ہے۔
ریٹائرمنٹ کے بعد ماہانہ قسطوں میں ملے گی رقم
نئی سہولت کے تحت ریٹائرمنٹ کے بعد ارکان اپنے پی ایف فنڈ کی پوری رقم ایک ساتھ نکالنے کے بجائے ماہانہ قسطوں کی شکل میں حاصل کر سکیں گے۔ اس دوران اکاؤنٹ میں باقی رقم پر ای پی ایف او کی مقررہ شرح سود کے مطابق سود بھی ملتا رہے گا۔ ای پی ایف او کے مطابق، ایس ڈبلیو پی کا مقصد ریٹائرڈ ارکان کو آمدنی کا ایک مستقل، باقاعدہ اور قابل اعتماد ذریعہ فراہم کرنا ہے۔ اس سے وہ اپنی زندگی بھر کی جمع پونجی کو ایک ساتھ خرچ کرنے کے بجائے منصوبہ بند طریقے سے استعمال کر سکیں گے اور اپنی مالی سلامتی برقرار رکھ سکیں گے۔
ارکان کی موت کی صورت میں نامزد شخص کو اختیار
اس نئی سہولت کا ایک اہم فائدہ یہ بھی ہوگا کہ ریٹائرڈ ملازمین کو زیادہ منافع حاصل کرنے کے لیے خطرے والے سرمایہ کاری کے متبادل اختیار کرنے کی ضرورت نہیں پڑے گی۔ وہ ای پی ایف او کی جانب سے ملنے والے سود کا فائدہ اٹھاتے ہوئے باقاعدہ ادائیگیاں حاصل کر سکیں گے۔ ای پی ایف او نے بتایا کہ اگر ادائیگی کی مدت کے دوران کسی رکن کی موت ہو جاتی ہے تو نامزد شخص یا زیر کفالت رکن اکاؤنٹ میں باقی رقم ایک ساتھ نکال سکتا ہے یا ماہانہ ادائیگیاں جاری رکھنے کا متبادل منتخب کر سکتا ہے۔ ادارے کے مطابق، اس پہل سے ارکان کو آمدنی کا ایک لچکدار، مستقل اور قابل اعتماد ذریعہ فراہم ہوگا، جس سے ریٹائرمنٹ کے وقت ان کی مالی سلامتی مضبوط ہوگی اور ان کے اہل خانہ کے مفادات کا بھی تحفظ ہو سکے گا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔



