National Education Day: مولانا ابوالکلام آزاد نے ایک ایسے ہندوستان کا خواب دیکھا تھا جہاں تعلیم صرف کتابی علم تک محدود نہ ہو بلکہ انسان کے کردار کی تعمیر کرے

نئی دہلی: 11 نومبر 1888 کو مکہ میں پیدا ہونے والا ایک 12 سالہ بچہ کلکتہ (موجودہ کولکاتا) میں ایک لائبریری، ریڈنگ روم اور مباحثے کی انجمن چلا رہا تھا۔ یہی نہیں، محض 14 سال کی عمر تک پہنچتے پہنچتے اس غیر معمولی صلاحیت کے حامل نوجوان نے ’المصباح‘ کے نام سے اپنا ادبی رسالہ بھی شائع کرنا شروع کر دیا تھا۔ اس رسالے میں وہ اپنے سے دوگنی عمر کے تجربہ کار اہلِ علم کی تحریروں کی ادارت کیا کرتے تھے۔ بچپن ہی سے ان کی سوچ اس قدر آزاد اور ترقی پسند تھی کہ انہوں نے اپنے خاندان کی روایتی اور قدامت پسند حدود سے آگے بڑھتے ہوئے اپنے لیے ایک نیا تخلص اختیار کیا، ’آزاد‘، یعنی ہر طرح کی پابندیوں سے آزاد۔ یہ غیر معمولی بچہ کوئی اور نہیں بلکہ آزاد ہندوستان کے پہلے وزیر تعلیم، عظیم مجاہدِ آزادی اور بھارت رتن مولانا ابوالکلام آزاد تھے۔ ان کی دور اندیش سوچ اور تعلیم کے شعبے میں غیر معمولی خدمات کے اعتراف میں ہر سال 11 نومبر کو ان کے یومِ پیدائش پر ’قومی یومِ تعلیم‘ منایا جاتا ہے۔

صحافت کو انگریزوں کے خلاف ہتھیار بنایا

مولانا آزاد نے عمر کے ساتھ صحافت اور تحریر و تصنیف کو برطانوی حکومت کے خلاف اپنا سب سے بڑا ہتھیار بنایا۔ ان کے اخبارات ’الہلال‘ اور ’البلاغ‘ نے نوجوانوں میں قوم پرستی کا ایسا جذبہ پیدا کیا کہ برطانوی حکومت کو ان پر پابندی عائد کرنا پڑی۔ مولانا آزاد کا وژن محض ملک کو آزادی دلانے تک محدود نہیں تھا۔ وہ جانتے تھے کہ آزادی کے بعد ملک کی تعمیر و ترقی کے لیے جس مضبوط بنیاد کی ضرورت ہوگی، وہ صرف تعلیم کے ذریعے ہی فراہم کی جا سکتی ہے۔ ان کا واضح نظریہ تھا کہ اسکول ایسی تجربہ گاہیں ہیں جہاں قوم کے مستقبل کی تشکیل ہوتی ہے۔

ملک کے پہلے وزیر تعلیم کی حیثیت سے اہم خدمات

1947 میں جب ہندوستان آزاد ہوا تو ملک تقسیم کے کرب، شدید غربت اور محض 12 فیصد شرحِ خواندگی جیسے مسائل سے دوچار تھا۔ ایسے مشکل حالات میں مولانا ابوالکلام آزاد نے ملک کے پہلے وزیر تعلیم کی ذمہ داری سنبھالی۔ اگلے 11 برسوں تک، یعنی 1958 تک، انہوں نے ہندوستان کے تعلیمی نظام کا جو خاکہ تیار کیا، اس کی اہمیت آج بھی برقرار ہے۔ انہوں نے سب سے پہلے 14 سال تک کی عمر کے تمام بچوں کے لیے مفت اور لازمی تعلیم کی وکالت کی۔ ان کا ماننا تھا کہ جب تک ملک کا ہر شہری، بالخصوص خواتین تعلیم یافتہ نہیں ہوں گی، ہندوستان ایک عظیم قوم نہیں بن سکتا۔ انہوں نے بالغوں کی تعلیم پر بھی زور دیا تاکہ وہ لوگ بھی خواندہ ہو سکیں جو بچپن میں تعلیم حاصل نہیں کر پائے تھے۔

آئی آئی ٹی کھڑگپور اور یو جی سی کے قیام میں اہم کردار

آج جن عالمی معیار کے تعلیمی اداروں پر ہم فخر کرتے ہیں، ان میں سے کئی مولانا آزاد کی دور اندیشی کا نتیجہ ہیں۔ وہ بخوبی سمجھتے تھے کہ ایک نئی قوم کو تکنیکی طور پر مضبوط ہونے کے ساتھ ساتھ اپنی تہذیبی جڑوں سے بھی وابستہ رہنا چاہیے۔ تکنیکی تعلیم کو فروغ دینے کے لیے انہوں نے ’آل انڈیا کونسل فار ٹیکنیکل ایجوکیشن‘ (اے آئی سی ٹی ای) کو مضبوط بنانے میں اہم کردار ادا کیا۔ ان کے دورِ وزارت میں 1951 میں پہلے انڈین انسٹی ٹیوٹ آف ٹیکنالوجی، یعنی آئی آئی ٹی کھڑگپور کا قیام عمل میں آیا۔ اس کے علاوہ اعلیٰ تعلیم کا معیار برقرار رکھنے کے لیے 1953 میں یونیورسٹی گرانٹس کمیشن (یو جی سی) کی بنیاد بھی رکھی گئی۔

فن، ادب اور ثقافت کے فروغ کے لیے ادارے قائم کیے

مولانا آزاد کی توجہ صرف سائنس اور ٹیکنالوجی تک محدود نہیں تھی۔ ہندوستانی فن، ادب اور ثقافت کے تحفظ اور فروغ کے لیے انہوں نے ساہتیہ اکادمی، للت کلا اکادمی اور سنگیت ناٹک اکادمی جیسے اہم اداروں کے قیام میں بھی اہم کردار ادا کیا۔ انڈین انسٹی ٹیوٹ آف سائنس (آئی آئی ایس سی)، بنگلورو اور دہلی یونیورسٹی کی توسیع میں بھی ان کی نمایاں خدمات رہیں۔ سال 2008 میں حکومتِ ہند نے مولانا ابوالکلام آزاد کی وراثت کو ہمیشہ کے لیے زندہ رکھنے کے مقصد سے 11 نومبر کو ’قومی یومِ تعلیم‘ قرار دیا۔ یہ دن محض ایک سرکاری تقریب کا موقع نہیں بلکہ خود احتسابی اور غور و فکر کا دن بھی ہے۔ مولانا آزاد نے ایک ایسے ہندوستان کا خواب دیکھا تھا جہاں تعلیم صرف کتابی علم تک محدود نہ ہو بلکہ انسان کے کردار کی تعمیر کرے، اس میں سائنسی سوچ پیدا کرے اور اسے ایک ذمہ دار شہری بنائے۔ ان کے والد مولانا خیرالدین ہندوستانی (بنگالی) عالم تھے، جو 1857 کی جنگِ آزادی کے بعد مکہ چلے گئے تھے۔ ان کا خاندان 1890 میں واپس کلکتہ (کولکاتا) آگیا تھا۔

بھارت ایکسپریس اردو۔