Nishant joins JDU: نشانت کمار جے ڈی یو میں ہوئے شامل، کہا-’’نتیش کمار کی رہنمائی میں پارٹی اور عوام کے اعتماد پر پورا اترنے کی کوشش کروں گا‘‘

پٹنہ: بہار کے وزیراعلیٰ نتیش کمار کے بیٹے نشانت کمار نے اتوار کو باقاعدہ طور پر اپنی سیاسی اننگز کا آغاز کرتے ہوئے جنتا دل یونائیٹڈ (جے ڈی یو) کی رکنیت اختیار کر لی۔ پٹنہ میں واقع پارٹی دفتر میں منعقدہ ایک تقریب میں انہیں جے ڈی یو کی رکنیت دلائی گئی۔ نشانت کمار کو پارٹی کے قومی ایگزیکٹو صدر سنجے کمار جھا اور مرکزی وزیر للن سنگھ نے باضابطہ طور پر پارٹی کی رکنیت دلائی۔ اس موقع پر وزیر وجے کمار چودھری، شرون کمار، بجیندر یادو اور رام ناتھ ٹھاکر سمیت جے ڈی یو کے کئی سینئر رہنما بھی موجود تھے۔

عوام کے اعتماد پر پورا اترنے کا عزم

پارٹی میں شامل ہونے کے بعد نشانت کمار نے کہا کہ پارٹی اور کارکنان نے ان پر جو اعتماد ظاہر کیا ہے، وہ اس پر پورا اترنے کی بھرپور کوشش کریں گے۔ انہوں نے کہا کہ وہ نتیش کمار کی رہنمائی میں کام کرتے ہوئے پارٹی تنظیم کو مضبوط بنانے پر توجہ دیں گے اور بہار میں گزشتہ دو دہائیوں کے دوران کیے گئے کاموں کو عوام تک پہنچائیں گے۔ نشانت کمار نے کہا کہ ان کے والد نتیش کمار کا راجیہ سبھا جانے کا فیصلہ ان کا ذاتی فیصلہ ہے اور وہ اس کا احترام کرتے ہیں۔ انہوں نے کہا کہ پورا خاندان اور پارٹی کارکن نتیش کمار کی رہنمائی میں آگے بڑھیں گے۔

کارکنوں میں زبردست جوش و خروش

نشانت کمار کی جے ڈی یو میں شمولیت کے موقع پر پارٹی کارکنوں میں خاصا جوش و خروش دیکھا گیا۔ پارٹی دفتر کے اندر اور باہر کارکنان ’’جے نتیش، جے نشانت‘‘ اور ’’نشانت ہیں تو نشچنت ہیں‘‘ جیسے نعرے لگاتے رہے۔ نشانت نے ہاتھ جوڑ کر کارکنوں کا خیر مقدم قبول کیا۔ ذرائع کے مطابق نشانت کمار جلد ہی پورے بہار کا دورہ شروع کریں گے تاکہ عوام سے براہ راست رابطہ قائم کر سکیں اور زمینی سطح پر اپنی شناخت بنا سکیں۔ پارٹی کے کئی کارکن انہیں بڑی ذمہ داری دینے اور حتیٰ کہ مستقبل میں وزیراعلیٰ بنانے کا مطالبہ بھی کر رہے ہیں۔ نتیش کمار کے راجیہ سبھا نامزدگی کے بعد نشانت کا فعال سیاست میں آنا بہار کی سیاست میں اہم پیش رفت قرار دیا جا رہا ہے۔

بھارت ایکسپریس اردو۔