BJP Government Completes One Year In Delhi: دہلی میں 500 نئی بسیں، 500 کلومیٹر میٹرو لائن: دہلی میں بی جے پی حکومت کا ایک سال مکمل، وزیراعلیٰ ریکھا گپتا نے پیش کیا مستقبل کا روڈمیپ

نئی دہلی: قومی دارالحکومت دہلی میں بھارتیہ جنتا پارٹی کی حکومت کے ایک سال مکمل ہونے پر اتوار کو تاریخی رام لیلا میدان میں ایک شاندار اور یادگار تقریب کا انعقاد کیا گیا۔ وزیراعلیٰ ریکھا گپتا کی قیادت میں منعقد ہونے والے اس بڑے پروگرام میں بی جے پی کے قومی صدر نتن نوین، مرکزی و ریاستی وزرا، پارٹی لیڈر اور بڑی تعداد میں عوام شریک ہوئے۔ اس موقع پر دہلی کے شہریوں کو 500 نئی الیکٹرک بسیں وقف کی گئیں اور آئندہ برسوں کے لیے حکومت کے ترقیاتی منصوبوں اور ترجیحات کو واضح کیا گیا۔ تقریب سے خطاب کرتے ہوئے وزیراعلیٰ ریکھا گپتا نے کہا کہ گزشتہ سال 8 فروری کی صبح دہلی کی تاریخ میں ایک اہم موڑ ثابت ہوئی، جب عوام نے 70 میں سے 48 نشستیں بی جے پی کو دے کر واضح اکثریت کے ساتھ اعتماد کا اظہار کیا۔ انہوں نے کہا کہ اسی دن سے دہلی میں ترقی کی ایک نئی عمارت کی بنیاد رکھی گئی اور وزیراعظم نریندر مودی کے وژن ’’ترقی بھی، وراثت بھی‘‘ کے اصول پر عمل شروع ہوا۔

ریکھا گپتا نے رام لیلا میدان کی تاریخی حیثیت کا ذکر کرتے ہوئے کہا کہ یہ مقام ملک کی کئی بڑی تحریکوں، جدوجہد اور عوامی آواز کا گواہ رہا ہے۔ انہوں نے سابق عام آدمی پارٹی حکومت اور اروند کیجریوال پر سخت تنقید کرتے ہوئے کہا کہ اسی میدان سے ایمانداری اور حب الوطنی کے دعوے کیے گئے، لیکن بعد میں دہلی نے شیش محل، بدانتظامی اور بدحالی کا دور دیکھا۔ ان کے مطابق تقریباً 11 برس تک دہلی ترقی کی دوڑ میں پیچھے رہی، بنیادی سہولتوں کی کمی رہی اور عوام مایوسی کا شکار ہو گئے تھے۔ وزیراعلیٰ نے کہا کہ 2025 کے انتخابات میں دہلی کی عوام نے خود کو ’’دہلی کا مالک‘‘ کہنے والوں کو بھرپور جواب دیا۔ انہوں نے اروند کیجریوال کے اس بیان کا حوالہ بھی دیا جس میں کہا گیا تھا کہ انہیں ہرانے کے لیے اگلا جنم لینا پڑے گا۔ ریکھا گپتا نے کہا کہ دہلی کی عوام نے اسی جنم میں ثابت کر دیا کہ وہ جسے سر پر بٹھانا جانتی ہے، وقت آنے پر اتارنا بھی جانتی ہے۔

انہوں نے کہا کہ 27 برس بعد دہلی میں بی جے پی کی حکومت بنی اور پہلے ہی دن سے حکومت نے اقتدار کو عیش نہیں بلکہ خدمت کا ذریعہ بنایا۔ گزشتہ 365 دنوں میں جمنا ندی کی صفائی، کچرے کے پہاڑ، سیور کے مسائل، ٹریفک اور آلودگی جیسے دیرینہ مسائل کے حل کے لیے مضبوط سیاسی عزم کے ساتھ کام شروع کیا گیا ہے، جس کے نتائج آہستہ آہستہ نظر آنے لگے ہیں۔ تقریب کے دوران وزیراعلیٰ نے 500 نئی الیکٹرک بسوں کو ہری جھنڈی دکھا کر دہلی کے عوام کے نام وقف کیا۔ انہوں نے بتایا کہ ان بسوں کے شامل ہونے سے دہلی میں الیکٹرک بسوں کی مجموعی تعداد 4000 ہو گئی ہے، جو پورے ملک میں سب سے زیادہ ہے۔ ان کا کہنا تھا کہ حکومت کا ہدف ہے کہ رواں سال کے اختتام تک یہ تعداد 7000 تک پہنچائی جائے، جبکہ سال 2028 تک 14 ہزار بسیں سڑکوں پر اتارنے کا منصوبہ ہے۔ ان بسوں سے نہ صرف عوامی نقل و حمل مضبوط ہوگی بلکہ فضائی آلودگی میں بھی نمایاں کمی آئے گی۔

میٹرو منصوبوں پر بات کرتے ہوئے وزیراعلیٰ ریکھا گپتا نے کہا کہ دہلی میٹرو ملک کا سب سے بڑا اور کامیاب شہری ریل نیٹ ورک ہے۔ اس وقت دہلی۔این سی آر میں تقریباً 400 کلومیٹر میٹرو لائن فعال ہے، جسے جلد ہی بڑھا کر 500 کلومیٹر تک لے جایا جائے گا۔ انہوں نے بتایا کہ میٹرو کے توسیعی منصوبوں میں تیزی لانے کے لیے دہلی میٹرو کو 5000 کروڑ روپے فراہم کیے گئے ہیں تاکہ تعمیراتی کام میں کسی قسم کی رکاوٹ نہ آئے۔ وزیراعلیٰ نے اعلان کیا کہ دہلی حکومت جلد ہی ایک جامع اور مؤثر نئی ای وی پالیسی متعارف کرائے گی۔ انہوں نے الزام لگایا کہ سابق حکومت نے الیکٹرک وہیکلز کے نام پر صرف دعوے کیے، لیکن عملی طور پر فنڈز خرچ نہیں کیے۔ خواتین کی سہولت کے لیے پنک کارڈ اسکیم شروع کرنے اور دہلی میں نیشنل موبیلٹی کارڈ نافذ کرنے کا بھی اعلان کیا گیا، جس سے بس اور میٹرو میں ایک ہی کارڈ کے ذریعے سفر ممکن ہو سکے گا۔ آخر میں ریکھا گپتا نے کہا کہ گزشتہ کئی برسوں کی بدانتظامی کو مکمل طور پر درست کرنے میں وقت لگے گا، لیکن حکومت پوری ایمانداری اور عزم کے ساتھ آگے بڑھ رہی ہے۔ انہوں نے یقین دلایا کہ دہلی حکومت وزیراعظم نریندر مودی کی قیادت میں ’’وکست بھارت‘‘ کے ساتھ قدم ملا کر ’’وکست دہلی‘‘ کی تعمیر کے لیے مسلسل کام کرتی رہے گی اور عوام کے اعتماد پر پوری طرح پورا اترے گی۔

بھارت ایکسپریس اردو۔