نیوزی لینڈ نے بھارتی سرزمین پر تاریخ رقم کرتے ہوئے پہلی بار ون ڈے سیریز اپنے نام کر لی۔ اندور میں کھیلے گئے تیسرے اور فیصلہ کن ون ڈے میچ میں کیوی ٹیم نے بھارت کو 41 رنز سے شکست دے کر سیریز 2-1 سے جیت لی۔ اس تاریخی کامیابی کے اصل ہیرو تجربہ کار دائیں ہاتھ کے بلے باز ڈیرل مچل رہے، جنہوں نے پوری سیریز میں شاندار کارکردگی کا مظاہرہ کیا اور پلیئر آف دی سیریز کا اعزاز حاصل کیا۔ ڈیرل مچل نے تین میچوں کی سیریز میں دو شاندار سنچریاں اور ایک نصف سنچری اسکور کی۔ پہلے ون ڈے میں شکست کے بعد نیوزی لینڈ نے دوسرے اور تیسرے میچ میں زبردست واپسی کی، جس میں مچل کی بلے بازی نے فیصلہ کن کردار ادا کیا۔ دوسرے اور تیسرے ون ڈے میں پلیئر آف دی میچ قرار پانے والے مچل کو سیریز کا بہترین کھلاڑی بھی منتخب کیا گیا۔
پلیئر آف دی سیریز بننے کے بعد ڈیرل مچل نے کہا کہ بھارت میں سیریز جیتنا ان کے لیے اور پوری ٹیم کے لیے بے حد خاص لمحہ ہے۔ انہوں نے کہا کہ ساتھی کھلاڑیوں کے ساتھ میدان میں موجود رہنا، دباؤ کے لمحات میں خود کو پرسکون رکھنا اور ہدف کو عبور کرنا ایک شاندار احساس ہے۔ مچل کے مطابق وہ صرف اس بات پر توجہ دیتے ہیں کہ گیند کو غور سے دیکھیں، صحیح فیصلے کریں اور اسی عمل کو بار بار دہراتے رہیں، جس کا نتیجہ کامیابی کی صورت میں سامنے آتا ہے۔
انہوں نے مزید کہا کہ مجھے اپنے ملک کے لیے کھیلنا بے حد پسند ہے۔ یہاں تک پہنچنے میں وقت ضرور لگا، لیکن گھریلو کرکٹ نے انہیں اپنے کھیل کو بہتر بنانے اور مشکل حالات میں خود کو سنبھالنے کا موقع دیا۔ مچل نے کہا کہ اس ٹیم کا حصہ بننا ان کے لیے فخر کی بات ہے اور یہ کامیابی ہمیشہ یادگار رہے گی۔
تیسرے ون ڈے میں سنچری بنانے والے گلین فلپس کی تعریف کرتے ہوئے ڈیرل مچل نے کہا کہ فلپس کو ایک بار پھر فارم میں واپس آتے دیکھنا خوشی کی بات ہے۔ انہوں نے کہا کہ شراکت داری ٹیم کی طاقت ہے اور فلپس نے طویل انجری کے بعد جس طرح واپسی کی ہے، وہ قابلِ ستائش ہے۔ ڈیرل مچل نے پہلے ون ڈے میں 71 گیندوں پر 84 رنز، دوسرے ون ڈے میں 117 گیندوں پر ناقابلِ شکست 131 رنز اور تیسرے ون ڈے میں 131 گیندوں پر 137 رنز کی شاندار اننگز کھیلی۔ سیریز میں مجموعی طور پر 352 رنز بنا کر انہوں نے نیوزی لینڈ کی تاریخی جیت میں مرکزی کردار ادا کیا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
