سال 2026 کا آغاز کیرالہ کی سیاست میں ایک نئے دور کی علامت بن گیا ہے۔ ترواننت پورم میونسپل کارپوریشن میں گزشتہ 45 برس سے جاری بائیں بازو کی حکمرانی کا خاتمہ ہو گیا ہے۔ بھارتیہ جنتا پارٹی کے رہنما وی وی راجیش نے میئر کے عہدے کا حلف لے کر تاریخ رقم کر دی۔ اس تاریخی کامیابی پر وزیراعظم نریندر مودی نے وی وی راجیش کو ایک جذباتی اور دل کو چھو لینے والا خط لکھا، جو اس وقت خوب زیرِ بحث ہے۔
وزیراعظم مودی نے اپنے خط میں لکھا کہ تہواروں کے موسم اور سال 2026 کے آغاز کے درمیان ترواننت پورم جیسے عظیم شہر نے تاریخ کے نئے اوراق رقم کیے ہیں۔ انہوں نے وی وی راجیش کو میئراورمحترمہ جی ایس آشا ناتھ کو ڈپٹی میئر منتخب ہونے پرمبارکباد دی۔ وزیراعظم مودی نے کہا کہ یہ کامیابی محض ایک انتخابی جیت نہیں بلکہ ایک ایسا سنگ میل ہے، جسے سنہرے حروف میں لکھا جائے گا۔ انہوں نے لکھا کہ شری پدمنابھ سوامی کے آشیرواد سے مقدس یہ سرزمین ہمیشہ مفکرین اور سنتوں کی رہی ہے اور ایسے شہر کی تائید حاصل ہونا باعثِ انکسار ہے۔
خط میں وزیراعظم مودی نے کیرالہ کی پرانی سیاسی روایت پر سخت تنقید بھی کی۔ انہوں نے کہا کہ دہائیوں تک بی جے پی کے کارکنوں نے مشکل حالات میں جدوجہد کی، جب کہ ریاست کی سیاست پر ایل ڈی ایف اور یو ڈی ایف کا غلبہ رہا، جنہوں نے بدعنوانی اور تشدد کی سیاست کو فروغ دیا۔ وزیراعظم مودی نے طنزیہ انداز میں لکھا کہ دہلی میں دوست اور کیرالہ میں دشمن ہونے کا ان کا یہ ‘فکسڈ میچ’ اب ختم ہونے والا ہے، کیونکہ کیرالہ کے عوام تبدیلی چاہتے ہیں۔
وزیراعظم مودی کا یہ خط ملنے پر نو منتخب میئر وی وی راجیش جذباتی ہو گئے۔ انہوں نے اسے وزیراعظم مودی کی جانب سے کیرالہ کے لیے ‘نئے سال کا تحفہ’ قرار دیا۔ راجیش نے کہا کہ ترواننت پورم میں یہ سیاسی تبدیلی اچانک نہیں آئی بلکہ یہ بی جے پی کارکنوں کی دہائیوں کی محنت، جدوجہد اور قربانیوں کا نتیجہ ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
