ہریانہ پولیس ڈپارٹمنٹ میں آئی پی ایس افسر وائی پورن کمار کی خودکشی کا معاملہ ابھی ٹھنڈا بھی نہیں ہوا تھا کہ اب روہتک میں ایک اور پولیس افسر نے اپنی جان دے دی۔ روہتک سائبر سیل کے انچارج اے ایس آئی سندیپ لاٹھر نے خود کو گولی مار کر خودکشی کرلی۔ جائے وقوعہ سے تین صفحات پر مشتمل ایک خودکشی نوٹ اور ایک ویڈیو پیغام برآمد ہوا ہے جس نے اس پورے معاملے کو ایک نیا اور سنسنی خیز موڑ دے دیا ہے۔
اپنے خودکشی نوٹ میں متوفی اے ایس آئی سندیپ نے آنجہانی آئی پی ایس افسر وائی پورن کمار پر سنگین الزامات لگائے ہیں۔ انہوں نے پورن کمار کو ایک “بدعنوان افسر” قرار دیا اور دعویٰ کیا کہ ان کے پاس آئی پی ایس افسر کے خلاف بدعنوانی کے ٹھوس ثبوت موجود تھے۔ اے ایس آئی سندیپ نے اپنے نوٹ میں لکھا ہے کہ وائی پورن کمار ذات پرستی کا سہارا لیکر اور ایماندار افسران کو ہراساں کر کے نظام کو ہائی جیک کر رہے تھے۔
ذرائع کے مطابق، اے ایس آئی سندیپ لاٹھر اس جانچ ٹیم کا حصہ تھے جو آئی پی ایس پورن کمار کے گن مین سشیل کمار سے وابستہ ایک کیس (وصولی کے الزامات) کی جانچ کر رہی تھی۔ خودکشی نوٹ میں اے ایس آئی نے یہ بھی لکھا ہے کہ پورن کمار نے گرفتاری کے خوف سے خودکشی کی۔ اے ایس آئی سندیپ نے اپنی خودکشی کو “بدعنوان نظام کے خلاف شہادت” قرار دیا اور آنجہانی آئی پی ایس افسر کے خاندان کے بارے میں منصفانہ تحقیقات کا مطالبہ کیا ہے۔
اس واقعہ سے محکمہ پولیس میں ہلچل مچ گئی ہے۔ پولیس نے خودکشی نوٹ اور ویڈیو قبضے میں لے کر تحقیقات شروع کر دی ہے۔ اسی محکمہ کے اندر بار بار ہونے والی خودکشیوں نے ہریانہ پولس کے کام کاج اور اندرونی تناؤ پر سنگین سوال کھڑے کر دیے ہیں۔
–بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
