CM Rekha Gupta Joins CMD Upendra Rai to Inaugurate ‘Badriya’: وزیر اعلیٰ ریکھا گپتا اور بھارت ایکسپریس کے سی ایم ڈی اُپیندر رائے نے کی ’’بدریا فیسٹیول‘‘ کی شمع افروزی، فنکاروں نے مانسون کو پیش کیا شاندار الوادعیہ

دہلی حکومت کی فن اور ثقافت کی وزارت اور ماتا چکیری دیوی فاؤنڈیشن نے پیر کے روز (1 ستمبر) کو دہلی کے NDMC کنونشن سینٹر میں مانسون کو یادگار الوداع پیش کرنے کے لیے ’’بدریا‘‘ پروگرام کا انعقاد کیا۔ اس تقریب میں دہلی کی وزیر اعلیٰ ریکھا گپتا کا استقبال بھارت ایکسپریس کے سی ایم ڈی اور ماتا چکیری دیوی فاؤنڈیشن کے ٹرسٹی اُپیندر رائے نے کیا۔ دہلی حکومت کے ثقافتی وزیر کپل مشرا نے اس پروگرام میں بطور مہمان خصوصی شرکت کی۔ بی جے پی کے میڈیا شریک انچارج سنجے میوکھ، ایم پی بانسری سوراج اور این ڈی ایم سی کے وائس چیئرپرسن کلجیت چاہل بھی تقریب میں موجود تھے۔

بھارت ایکسپریس کے سی ایم ڈی اُپیندر رائے اور سی ایم ریکھا گپتا نے چراغ جلا کر پروگرام کا افتتاح کیا۔ قبل ازیں سی ایم ڈی اُپیندر رائے نے وزیر اعلیٰ ریکھا گپتا کا استقبال کیا۔ ماتا چکیری دیوی ٹرسٹ کے چیف ٹرسٹی برجیش رائے نے دہلی حکومت کے ثقافتی وزیر کپل مشرا کا خیرمقدم کیا۔ اس موقع پر سدیانت کوشل نے سرسوتی وندنا گا کر پروگرام کا آغاز کیا۔

’’بدریا‘‘ میں شامل ہوئے ملک کے معروف فنکار، اپنی شاندار پرفارمنس پر حاضرین کو کیا محظوظ

اس پروگرام میں جب لوک گلوکارہ پدم شری مالنی اوستھی نے بھوجپوری لوک گیت پیش کیے تو حاضرین نے زوردار تالیوں سے ان کو بھرپور داد دی۔ وہیں میتھلی کے لوک گلوکار شری کنج بہاری مشرا، طبلہ وادک رمپا شیوا، بانسری وادک ویشنوی جوشی، ستار وادک میگھا راوت نے بھی شاندار پرفارمنس دی۔ اس کے علاوہ نینیکا گھوش اور ٹیم نے کتھک رقص کا مظاہرہ کرتے ہوئے ایک مسحور کن کارکردگی پیش کی۔

دریں اثنا مہمان خصوصی انشو کلا اور پشپانجلی گروپ نے میتھلی اور بھوجپوری لوک رقص اور سمردھی پاٹھک اور سانوی پاٹھک نے میتھلی بھجن گا کر بدریا کی شام کو مزید روشن کیا۔ اس پروگرام سے خطاب کرتے ہوئے سی ایم ریکھا گپتا نے کہا کہ ’’میں نے بدریا کا لفظ سن کر اس پروگرام میں شرکت کا فیصلہ کیا۔ جب میں این ڈی ایم سی میں خواتین کی ترقی اور بچوں کی بہبود کی صدر بنی تو تاریخی کاموں کا بھی اہتمام کیا گیا۔ اب کپل مشرا اس سمت میں مسلسل شاندار پروگرام منعقد کر رہے ہیں۔‘‘

وہیں تقریب سے خطاب کرتے ہوئے ریاست کے ثقافتی وزیر کپل مشرا نے کہا کہ بھوجپوری میتھلی سماج کا یہ پہلا پروگرام ہے اور وزیر اعلیٰ خود اس میں موجود ہیں۔ اس بار دہلی میں تاریخی کانوڑ یاترا کا بھی اہتمام کیا گیا۔ آنے والے وقت میں ایک تاریخی چھٹھ پوجا کا بھی اہتمام کیا جائے گا۔ واضح رہے کہ یہ پروگرام ماتا چکیری دیوی فاؤنڈیشن کے ٹرسٹی اُپیندر رائے کی قیادت میں منعقد کیا گیا تھا، جس کا مقصد دہلی میں بھوجپوری اور میتھلی ثقافت کو فروغ دینا تھا۔ پروگرام میں ٹرسٹ کے بانی برجیش رائے کے علاوہ ٹرسٹ کے دیگر ممبران اپورو سنگھ اور پرمود کمار بھی موجود تھے۔

بھارت ایکسپریس اردو