(فائل فوٹو)
کرناٹک کے وزیر اعلیٰ سدارمیا نے ہفتے کے روز کہا کہ لوک سبھا انتخابات میں مبینہ ووٹ چوری کے معاملے کی تحقیقات قانون محکمہ کرے گا اور یہ عمل بروہت بنگلورو مہانگر پالیکے (بی بی ایم پی) انتخابات سے پہلے مکمل کیا جائے گا۔ صحافیوں سے گفتگو کرتے ہوئے وزیر اعلیٰ نے کہا کہ ایڈووکیٹ جنرل کو ہدایت دی جائے گی کہ وہ فوری طور پر تحقیقات کر کے رپورٹ پیش کریں، جس کی سفارشات کے مطابق قانونی کارروائی کی جائے گی۔
راہل گاندھی کے الزامات کے بعد تحقیقات کا فیصلہ
یہ بیان کانگریس کے رکن پارلیمنٹ راہل گاندھی کے اس الزام کے بعد آیا ہے کہ 2024 کے لوک سبھا انتخابات الیکشن کمیشن نے بی جے پی کو فائدہ پہنچانے کے لیے ’’منصوبہ بندی‘‘ کے تحت کرائے۔ راہل گاندھی نے دعویٰ کیا تھا کہ یہ ووٹ چوری بی بی ایم پی انتخابات سے پہلے سامنے لائی جانی چاہیے۔
جی پرمیشور کا بیان اور شکایت کا اعلان
اسی روز کرناٹک کے وزیر جی پرمیشور نے کہا کہ کرناٹک پردیش کانگریس کمیٹی (کے پی سی سی) ریاستی الیکشن کمیشن میں باضابطہ شکایت درج کرائے گی۔ انہوں نے کہا کہ لوک سبھا میں اپوزیشن لیڈر راہل گاندھی اس معاملے میں مرکزی الیکشن کمیشن سے بھی رجوع کریں گے۔ ان کے مطابق الیکشن کمیشن نے راہل گاندھی سے ان الزامات سے متعلق دستاویزات فراہم کرنے کو کہا ہے۔
الیکشن کمیشن کو ثبوت فراہم کرنے کا عزم
جی پرمیشور نے کہا کہ ’’الیکشن کمیشن کچھ بھی کہے، ہم کمیشن کے اصولوں کے مطابق انہیں معلومات فراہم کریں گے۔ راہل گاندھی کو خود دستاویز دینے کی ضرورت نہیں ہے۔ چونکہ وہ ہمارے ریاست میں ہیں، کے پی سی سی صدر یہ معلومات فراہم کریں گے۔ ووٹر فہرست میں فرق پایا گیا ہے اور کمیشن کو اسے تسلیم کرنا چاہیے۔‘‘
مہادیوپورہ میں ایک لاکھ سے زائد ووٹ چوری کا دعویٰ
7 اگست کو پریس کانفرنس میں راہل گاندھی نے کہا کہ کانگریس کو کرناٹک میں 16 نشستیں جیتنے کی امید تھی لیکن صرف 9 ملی۔ انہوں نے کہا کہ پارٹی نے 7 غیر متوقع ہاروں کی تحقیقات کی اور مہادیوپورہ پر توجہ مرکوز کی جہاں ایک لاکھ دو سو پچاس ووٹ چوری کیے گئے۔ ان کے مطابق یہ ووٹ چوری پانچ مختلف طریقوں سے ہوئی، جن میں ڈپلیکیٹ ووٹر، جعلی اور غلط پتے اور ایک ہی پتے پر بڑی تعداد میں ووٹروں کا اندراج شامل ہے، جبکہ موقع پر ایسی رہائش کا کوئی وجود نہیں پایا گیا۔
الیکشن کمیشن کا ردعمل
دوسری جانب الیکشن کمیشن آف انڈیا نے ایک بار پھر راہل گاندھی سے کہا ہے کہ وہ قواعد کے مطابق حلفیہ بیان دیں یا اپنے ’’غلط‘‘ الزامات پر قوم سے معافی مانگیں۔ کمیشن کا کہنا ہے کہ اگر الزامات کے ثبوت ہیں تو فراہم کیے جائیں، ورنہ عوام کو گمراہ کرنے سے گریز کیا جائے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
