Mumbai Train Blast 2006 Case: ممبئی ٹرین دھماکہ معاملے میں سبھی 12 مسلم ملزمین کیسے ہوگئے بری؟ دیکھیں ویڈیو

نئی دہلی: سال 2006 میں ممبئی کی لوکل ٹرین میں ہوئے بلاسٹ معاملے میں بامبے ہائی کورٹ نے 12 ملزمین کو ثبوتوں کی کمی کی وجہ سے بری کردیا ہے۔ ان میں سبھی کے سبھی مسلمان ہیں۔ ہائی کورٹ نے سبھی کو بے قصور قرار دیتے ہوئے فوراً جیل سے رہا کرنے کا حکم دیا ہے۔ وہیں بڑا سوال یہ ہے کہ بڑی تعداد میں ہلاک ہونے والوں کی فیملی کو انصاف کون دلائے گا؟ ممبئی لوکل ٹرین 2006 بلاسٹ معاملے میں عدالت نے بڑا فیصلہ سناتے ہوئے سبھی 12 ملزمین کو بری کردیا ہے۔ حالانکہ ایک ملزم کی پہلے ہی موت ہوگئی ہے۔ اس طرح سے اب 11 ملزمین کو رہا کرنے کا راستہ  صاف ہوگیا ہے۔ اس سے پہلے  نچلی عدالت نے ستمبر2015 میں مکوکا کے تحت سساس معاملے میں  5 ملزمین کو سزائے موت سنائی گئی تھی جبکہ 7 کوعمرقید کی سزا ملی تھی۔ اس طرح سے دیکھا جائے توبامبے ہائی کورٹ نے 19 سال بعد ان ملزمین کو بری کرتے ہوئے رہا کرنے کا حکم دیا ہے۔ جسٹس انیل کلوراورشیام چانڈک کی بنچ نے کہا، “پراسیکیوٹریہ بھی ثابت نہیں کرسکا کہ جرم میں کس قسم کے بم استعمال کیے گئے تھے اوراس کے ذریعہ جس ثبوت کوبنیاد بنایا گیا ہے وہ ملزم کو سزا دینے کے لیے کافی نہیں ہے۔ عدالت نے اپنے فیصلے میں پراسیکیوٹرپرسوال اٹھاتے ہوئے کہا کہ اس نے مقدمے میں اہم گواہ پیش نہیں کیے۔  بینچ نے اپنے فیصلے میں یہ کہہ کراے ٹی ایس پرسوال اٹھایا کہ وہ معاملے میں اہم گواہوں سے موثراور پربھاوی طریقے سے پوچھ تاچھ کرنے میں ناکام رہا۔ ساتھ ہی دھماکہ خیزچیزوں اورسرکٹ باکس جیسی برآمد چیزوں کے ثبوت ملزمین کے خلاف کرائم کو ثابت کرنے کے لئے کافی نہیں۔ ہائی کورٹ نے اے ٹی ایس کی جانچ پرکہا کہ معاملہ سلجھانے کا جھوٹا دکھاوا کرنا اور اس کے ذریعہ ملزمین کوانصاف کے کٹہرے میں لایا جانا، سماج کوجھوٹی یقین دہانی کراتا ہے، یہ بہت خطرناک ہے۔ ہائی کورٹ کے فیصلے کے بعد مہاراشٹراے ٹی ایس کے لئے شرمندگی کی بات ہے کیونکہ اسی نے اس پورے معاملے کی جانچ کی تھی۔

ممبئی لوکل ٹرین بم دھماکہ معاملہ کیا ہے؟

آئیے سب سے پہلے یہ سمجھتے ہیں کہ ممبئی لوکل ٹرین بم دھماکہ معاملہ کیا ہے؟ کب اور کیسے پیش آیا۔  آپ کو بتا دیں کہ 11 جولائی 2006 کی شام میں ممبئی کی لوکل ٹرین میں دھماکہ ہوا تھا۔ صرف 11 منٹ کے وقفے میں سات الگ الگ مقامات پر بم دھماکے ہوئے تھے۔ اس دھماکے میں 189 افراد کی جان چلی گئی تھی اور827 سے زیادہ مسافرزخمی ہوئے تھے۔ عدالت نے کہا کہ جو بھی ثبوت پیش کئے گئے تھے، ان میں کوئی ٹھوس دلیل نہیں تھی اور اسی کی بنیاد پرسبھی ملزمین کو شک کی بنیاد کا فائدہ دیتے ہوئے بری کیا گیا ہے۔

بامبے ہائی کورٹ نے 19 سال بعد دیا تاریخی فیصلہ

بامبے ہائی کورٹ کا یہ فیصلہ 19 سال بعد آیا ہے۔ اس فیصلے کے بعد اے آئی ایم آئی ایم کے چیف اور حیدرآباد سے ایم پی اسدالدین اویسی نے کئی سوال اٹھائے ہیں۔ انہوں نے پوچھا ہے کہ جو بے قصور لوگ 18 سالوں تک جیل میں رہے، ان کا کیا ہوگا؟ ان کی زندگی کا معاوضہ کون دے گا؟ انہوں نے کہا کہ اس کے لئے جانچ ایجنسیاں ذمہ دار ہیں۔اسدالدین اویسی نے کہا کہ 12 مسلم مرد 18 سال سے جیل میں ہیں، وہ بھی ایک ایسے جرم کے لیے جوانہوں نے کیا ہی نہیں۔ ان کی سنہری زندگی جیل میں ضائع ہوگئی۔ انہوں نے کہا کہ ممبئی لوکل ٹرین دھماکے میں جان گنوانے والے 180 خاندانوں نے اپنے پیاروں کو کھو دیا اوربہت سے لوگ زخمی ہوئے، لیکن انہیں ابھی تک انصاف نہیں ملا۔ اب سوال یہ اٹھ رہا ہے کہ تمام 12 ملزمین کے 18 سال جیل میں گزرگئے ہیں اوران کی جوانی ختم ہوگئی ہے۔ انہیں انصاف کیسے ملے گا؟ دوسری طرف جن 189 لوگوں کی جان گئی اور827 سے زیادہ مسافرزخمی ہوئے، انہیں انصاف کب ملے گا؟ آخراصل مجرمین کہاں چلے گئے اور پولیس ان تک کیوں نہیں پہنچ سکی ؟