'کانگریس نے اپنے ہی حلیفوں کی کشتی بھی ڈبو دی'، مہاراشٹر میں مہا وکاس اگھاڑی کی شکست پر پی ایم مودی کا طنز
Maharashtra Assembly Election Results 2024: مہاراشٹر اسمبلی انتخابات میں مہا یوتی کی زبردست جیت اور یوپی ضمنی انتخابات میں بی جے پی کی شاندار کامیابی نے اپوزیشن کو بیک فٹ پر ڈال دیا ہے۔ ان انتخابی نتائج کے بعد وزیر اعظم نریندر مودی نے کانگریس کو ہندوستانی سیاست میں ’’طفیلی پارٹی‘‘قرار دیتے ہوئے سخت نشانہ بنایا۔ انہوں نے الزام لگایا کہ کانگریس نہ صرف اپنی ہی شکست کا سبب بن رہی ہے بلکہ اپنے اتحادیوں کو بھی نیچے کھینچ رہی ہے۔
مہاراشٹر میں کانگریس کی خراب کارکردگی کا ذکر کرتے ہوئے وزیر اعظم نے کہا کہ پارٹی نے ویر ساورکر کے معاملے کو انتخابات میں عارضی طور پر چھوڑ دیا، لیکن عوام کا اعتماد حاصل نہیں کرسکی۔ کانگریس اور اس کے اتحاد کو ریاست میں ہر پانچ میں سے چار سیٹوں کا نقصان ہوا اور ان کا اسٹرائیک ریٹ 20 فیصد سے بھی کم رہا۔
’’ خوشامد کی سیاست اور وقف بورڈ تنازعہ‘‘
پی ایم مودی نے کانگریس پر خوشامد کی سیاست کرنے اور ووٹ بینک کے لیے آئین کے ساتھ کھیلنے کا الزام لگایا۔ انہوں نے کہا کہ 2014 میں اقتدار چھوڑنے کے بعد کانگریس نے دہلی اور اس کے اطراف میں کئی جائیدادیں وقف بورڈ کے حوالے کر دیں۔ انہوں نے اسے بابا صاحب امبیڈکر اور آئین بنانے والوں کے ساتھ غداری قرار دیا۔ پی ایم نے کہا کہ کانگریس نے ’’جھوٹے سیکولرزم‘‘ کے نام پر ملک کی سیکولر روایت کو نقصان پہنچایا ہے۔
ذات پات کا زہر اور کانگریس کی طاقت کی بھوک
کانگریس پر سماجی انصاف کی روح کو نقصان پہنچانے کا الزام لگاتے ہوئے وزیر اعظم نے کہا کہ پارٹی ذات پات کے خلاف لڑنے کے بجائے اب ذات پات کا زہر پھیلانے میں لگی ہوئی ہے۔ انہوں نے کہا کہ کانگریس کا ’شاہی خاندان‘ اپنے اقتدار کی بھوک کو پورا کرنے کے لیے ملک اور سماج کے مفادات کو نظر انداز کر رہا ہے۔ یہ جماعت نہ صرف اپنے نظریے سے ہٹ چکی ہے بلکہ اپنے پرانے حامیوں اور کارکنوں کو بھی مایوس کر رہی ہے۔
-بھارت ایکسپریس
