ہاتھرس میں میکس لوڈر اور روڈ ویز بس کے درمیان تصادم میں ہلاکتوں کی تعداد ہوئی 17، زخمیوں کا علاج جاری
Hathras Roadways Bus Accident: یوپی کے ہاتھرس میں 6 ستمبر کو میکس لوڈر اور روڈ ویز بس کے درمیان تصادم میں مرنے والوں کی تعداد بڑھ گئی ہے۔ یہ خبر لکھے جانے تک اس حادثے میں 17 لوگوں کی موت ہو چکی ہے۔ اس میں 15 لوگوں کی موقع پر ہی موت ہو گئی اور 2 لوگوں کی ہسپتال میں علاج کے دوران موت ہو گئی۔
ہلاک ہونے والوں میں 7 مرد، 4 خواتین اور 6 بچے شامل ہیں۔ ہلاک ہونے والے 17 افراد میں سے 16 افراد کھندولی کے گاؤں سیمرا کے رہائشی ہیں اور ایک شخص دیدامئی فیروز آباد کا رہائشی ہے۔ میکس لوڈر پر سوار لوگ ساسنی گاؤں میں مکند کھیڑا چالیسہ کی دعوت کے بعد کھندولی کے قریب سیمرا گاؤں واپس لوٹ رہے تھے۔ معاملہ آگرہ علی گڑھ بائی پاس کے چندپا تھانہ علاقے میں واقع میتئی گاؤں کا ہے۔
جائے وقوعہ سے کئی خوفناک ویڈیوز سامنے آئی ہیں۔ کئی بچے بری طرح زخمی ہیں اور ان کا علاج جاری ہے۔ پولیس مسلسل مدد کر رہی ہے۔ اس ناگہانی واقعہ سے ہلاک افراد کے اہل خانہ میں کہرام مچ گیا ہے۔
صدر، وزیراعظم اور وزیراعلیٰ نے کیا غم کا اظہار اور معاوضے کا بھی کیا اعلان
صدر دروپدی مرمو اور وزیر اعظم نریندر مودی نے ہاتھرس میں ہولناک سڑک حادثے پر غم کا اظہار کیا ہے۔ اس کے علاوہ مرکزی حکومت نے حادثے میں ہلاک ہونے والوں کے لواحقین کو 2 لاکھ روپے اور زخمیوں کو 50 ہزار روپے کی مالی امداد کا اعلان کیا ہے۔
ہاتھرس حادثے پر غم کا اظہار کرتے ہوئے صدر دروپدی مرمو نے کہا، ‘اتر پردیش کے ہاتھرس ضلع میں سڑک حادثے میں کئی لوگوں کی موت کی خبر انتہائی افسوسناک ہے۔ میں غمزدہ خاندانوں کے تئیں اپنی گہری تعزیت کا اظہار کرتی ہوں جنہوں نے اپنے پیاروں کو کھو دیا اور زخمیوں کی جلد صحت یابی کے لیے دعا کرتی ہوں۔
ساتھ ہی سی ایم یوگی آدتیہ ناتھ نے بھی اس واقعہ پر افسوس کا اظہار کیا ہے۔ انہوں نے کہا کہ میری ہمدردیاں مرنے والوں کے سوگوار خاندانوں کے ساتھ ہیں۔ ضلعی انتظامیہ کے اہلکاروں کو زخمیوں کو مناسب علاج فراہم کرنے کی ہدایت کی گئی ہے۔ وزیر اعلی یوگی آدتیہ ناتھ نے ہاتھرس میں سڑک حادثے میں ہر مرنے والے کے لواحقین کو 2 لاکھ روپے اور شدید زخمیوں کو 50 ہزار روپے دینے کا اعلان کیا ہے۔
-بھارت ایکسپریس
