یوپی کے وزیر توانائی اے کے شرما۔
ہنڈن برگ ریسرچ کے انکشاف کے بعد ایک طرف اڈانی گروپ کے شیئر مسلسل گر رہے ہیں تو وہیں اڈانی گروپ کو اترپردیش حکومت نے بھی جھٹکا دے دیا ہے۔ گزشتہ دنوں اڈانی ٹرانسمیشن، جی ایم آر اور انٹیلی اسمارٹ کمپنی کو ملنے والا پریپیڈ اسمارٹ میٹر کا ٹینڈر منسوخ کردیا گیا ہے۔ اترپردیش میں 2.5 کروڑ پریپیڈ اسمارٹ لگانے کے ٹینڈر کی لاگت 25 ہزار کروڑ تھی۔
اس پر اب ریاست کے وزیر توانائی اے کے شرما کا ردعمل سامنے آیا ہے، جس میں انہوں نے کہا ہے کہ یہ عام بات ہے کہ ٹینڈر ہوتے ہیں، منسوخ ہوجاتے ہیں۔ ساتھ ہی انہوں نے سماجودای پارٹی کے ایم ایل سی سوامی پرساد موریہ کے رام چرت مانس پر ہو رہے ہنگامہ سے متعلق انہوں نے کہا کہ ہمارے لئے سناتن دھرم سب سے اوپر ہے اورجس کا جیسا جذبہ ہوگا، ویسا ہی خدا اس کو نظر آئے گا۔
مدھیانچل ودیت وترن نگم نے ٹینڈر کینسل کردیا
واضح رہے کہ گزشتہ دنوں مدھیانچل ودیت وترن نگم نے ٹینڈر کینسل کردیا ہے۔ صرف مدھیانچل ودیت وترن نگم کا 5454 کروڑ کا ٹینڈر پاس کیا گیا تھا۔ ٹینڈر کی تخمینہ لاگت تقریباً 48 سے 65 فیصد زیادہ تھی، جس کی وجہ سے اس کی مخالفت کی جا رہی تھی۔ میٹر کی قیمت تقریباً 9 سے 10 ہزار روپئے پڑ رہی تھی جبکہ تخمینہ لاگت 6 ہزار فی میٹر تھی۔
اس میں میسرس اڈانی پاور ٹرانسمیشن کے علاوہ جی ایم آراورانٹیلی اسمارٹ کمپنی نے ٹینڈر کا پارٹ 2 حاصل کیا تھا اور انہیں کام کرنے کا حکم جاری ہونے والا تھا۔ ریاستی صارفین کونسل (اسٹیٹ کنزیومرکونسل) نے مہنگا میٹر لگانے کی بات کہی تھی اور کونسل نے ریگولیٹری کمیشن میں عرضی بھی داخل کی۔ اس کی شکایت وزیر اعلیٰ یوگی آدتیہ ناتھ سے کی گئی تھی۔
یہ بھی پڑھیں: کشمیر میں بلڈوزر کی کارروائی پر محبوبہ مفتی سخت ناراض، کہا- ’کشمیر کو افغانستان بنا دیا، فلسطین ہم سے بہتر
تمام الزامات کے درمیان مدھیانچل ودیوت وترن نگم کے سپرنٹنڈنگ انجینئر فائنانس اشوک کمار نے اڈانی گروپ کا ٹینڈر منسوخ کردیا۔ اس کے پیچھے تکنیکی وجوہات سے ٹینڈر منسوخ ہونا بتایا گیا ہے۔ ٹینڈرمنسوخ کرنے کو اسٹیٹ کنزیومر کونسل نے صحیح بتایا اور کہا کہ مہنگے ٹینڈرکے ذریعہ صارفین پر اضافی بوجھ پڑے گا۔
