آسٹریلیائی بلے باز ٹریوس ہیڈ۔
سڈنی: بھارت کے خلاف سڈنی کرکٹ گراؤنڈ میں کھیلے گئے تیسرے ون ڈے میچ میں ٹریوس ہیڈ نے صرف 29 رنز کی اننگ کھیل کر تاریخ رقم کر دی۔ ہیڈ سب سے کم اننگز میں 3 ہزار ون ڈے رنز مکمل کرنے والے آسٹریلیائی بلے باز بن گئے ہیں۔ ٹریوس ہیڈ نے یہ کارنامہ صرف 76 اننگز میں انجام دیا، جبکہ اسٹیو اسمتھ نے 79 اننگز میں یہ سنگ میل عبور کیا تھا۔ مائیکل بیون اور جارج بیلی نے 80-80 اننگز میں یہ ہدف حاصل کیا، جبکہ ڈیوڈ وارنر نے 81 اننگز میں 3 ہزار رنز مکمل کیے تھے۔
سب سے کم گیندوں میں 3 ہزار ون ڈے رنز بنانے والے کھلاڑیوں کی فہرست میں ٹریوس ہیڈ چوتھے نمبر پر ہیں۔ عالمی سطح پر اس فہرست میں گلین میکسویل سرفہرست ہیں، جنہوں نے صرف 2,440 گیندوں میں 3 ہزار رنز مکمل کیے۔ انگلینڈ کے جوش بٹلر نے 2,533 گیندوں میں یہ کارنامہ انجام دیا۔
تیسرے نمبر پر موجود جیسن رائے نے 2,820 گیندوں میں 3 ہزار رنز مکمل کیے، جبکہ ٹریوس ہیڈ نے 2,839 گیندوں میں یہ سنگ میل عبور کیا۔ جونی بیئرسٹو 2,842 گیندوں میں 3 ہزار رنز بنا کر پانچویں نمبر پر ہیں۔
روہت شرما اور وراٹ کوہلی نے شاندار بیٹنگ کا مظاہرہ کرتے ہوئے بھارت کو آسٹریلیا کے خلاف 9 وکٹوں سے فتح دلوائی اور تین میچوں کی ون ڈے سیریز کا تیسرا میچ جیت کر بہتر انداز میں سیریزختم کیا۔ پہلے دونوں میچز میں بھارت کو شکست ہوئی تھی اور آسٹریلیا نے سیریز میں 2-0 کی برتری حاصل کر رکھی تھی، لیکن سڈنی ون ڈے میں بھارت نے شاندار واپسی کی۔
روہت کی سنچری، کوہلی کی نصف سنچری
بھارت نے 237 رنز کے ہدف کے تعاقب میں مضبوط آغاز کیا۔ کپتان شبھمن گل اور روہت شرما نے پہلے وکٹ کے لیے 69 رنز کی شراکت قائم کی۔ گل 24 رنز پر آؤٹ ہوئے، جس کے بعد روہت اور وراٹ کوہلی نے دوسری وکٹ کے لیے ناقابل شکست 168 رنز کی شراکت قائم کی۔ روہت نے 125 گیندوں پر 121 رنز بنائے، جس میں 13 چوکے اور 3 چھکے شامل تھے، جبکہ کوہلی نے 81 گیندوں پر 74 رنز بنائے۔
آسٹریلیا کی پوری ٹیم 236 پر ہوئی آؤٹ
آسٹریلیا نے پہلے بلے بازی کرتے ہوئے 46.4 اوورز میں 236 رنز بنائے اور پوری ٹیم میچ ختم ہونے سے تین اوورز دو گیند پہلے ہی آؤٹ ہوگئی۔ شروعات میں ٹریوس ہیڈ اور مچل مارش نے 61 رنز کی شراکت کی، جس کے بعد محمد سراج، اکشر پٹیل، واشنگٹن سندر، ہرشت رانا اور دیگر بھارتی گیندبازوں نے آسٹریلیا کے خلاف شاندار کارکردگی کا مظاہرہ کیا اور آسٹریلوی بیٹنگ لائن اپ کو پوری طرح ناکام کردیا۔ ہرشت رانا نے بھارت کی جانب سے شاندار گیندبازی کا مظاہرہ کرتے ہوئے 8.4 اوورز میں 39 رن دے کر 4 کھلاڑیوں کو آؤٹ کیا۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
