نئی دہلی: ہندوستانی مردوں کی کرکٹ ٹیم نے ایشین گیمز 2026 کے فائنل میں جگہ بنا لی ہے۔ سیمی فائنل میں سری لنکا کو 124 رنز سے شکست دینے کے بعد اب ٹیم انڈیا فائنل میں پاکستان کے خلاف میدان میں اترے گی، جہاں اس کی نظریں گولڈ میڈل اپنے نام کرنے پر ہوں گی۔ ہندوستانی ٹیم کو ایشین گیمز کے کرکٹ فائنل میں اب تک صرف ایک بار پہنچنے کا موقع ملا ہے۔ گزشتہ ایشین گیمز میں بھی ٹیم انڈیا نے فائنل میں جگہ بنائی تھی، تاہم بارش کے باعث یہ مقابلہ مکمل نہیں ہو سکا تھا۔ بہتر ٹی20 رینکنگ کی بنیاد پر افغانستان کے خلاف ہندوستان کو فاتح قرار دے کر گولڈ میڈل دیا گیا تھا۔ افغانستان نے اس میچ میں 18.2 اوورز میں 5 وکٹوں کے نقصان پر 112 رنز بنائے تھے۔ ہندوستان کی جانب سے گیند بازی میں ارشدیپ سنگھ، شیوم دوبے اور روی بشنوئی نے ایک ایک وکٹ حاصل کی تھی۔
پاکستان کے خلاف مضبوط ریکارڈ
ایشین گیمز 2026 کا فائنل ہندوستان اور پاکستان کے درمیان 3 اکتوبر کو کھیلا جائے گا۔ پاکستان کے خلاف ٹی20 انٹرنیشنل میں ہندوستان کا ریکارڈ مضبوط رہا ہے۔ دونوں ٹیموں کے درمیان اب تک مجموعی طور پر 17 ٹی20 انٹرنیشنل میچ کھیلے گئے ہیں، جن میں ہندوستان نے 13 مقابلوں میں کامیابی حاصل کی ہے، جبکہ پاکستان کو صرف 3 میچوں میں فتح ملی ہے۔ ایک مقابلہ ٹائی رہا تھا، جس کا فیصلہ بھی ہندوستان نے اپنے حق میں کیا تھا۔ شریئس ایئر کی کپتانی میں ٹیم انڈیا پاکستان کے خلاف اپنے سابقہ ریکارڈ کو برقرار رکھنے کے ارادے سے میدان میں اترے گی۔ ہندوستان اور پاکستان کے درمیان آخری مقابلہ ٹی20 ورلڈ کپ 2026 میں ہوا تھا، جہاں ہندوستان نے پاکستان کو 61 رنز سے شکست دی تھی۔
سیمی فائنل میں ہندوستان کی بڑی جیت
ایشین گیمز کے سیمی فائنل میں ٹیم انڈیا نے شاندار کارکردگی کا مظاہرہ کیا۔ پہلے بلے بازی کرتے ہوئے ہندوستان نے 20 اوورز میں 7 وکٹوں کے نقصان پر 169 رنز بنائے۔ ٹیم کی جانب سے ایشان کشن نے 80 رنز کی ناقابل شکست اننگز کھیلی، جبکہ وائبھَو سوریہ ونشی نے 38 رنز بنائے۔ جواب میں سری لنکا کی پوری ٹیم محض 45 رنز پر آل آؤٹ ہوگئی اور ہندوستان نے 124 رنز سے بڑی کامیابی حاصل کی۔ دوسری جانب پاکستان نے بارش سے متاثرہ پہلے سیمی فائنل میں بنگلہ دیش کو 6 وکٹوں سے شکست دے کر فائنل میں جگہ بنائی ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
