Akash Deep draws high praise from Nasir Hussain: انگلینڈ میں بھارت کی جانب سے بہترین بولنگ کا نیا ریکارڈ، آکاش دیپ کی شاندار کارکردگی پر ناصر حسین کی زبردست تعریف

برمنگھم: بھارت اور انگلینڈ کے درمیان اینڈرسن تندولکر ٹرافی 2025 کا دوسرا میچ برمنگھم کے ایجبسٹن گراؤنڈ میں کھیلا گیا۔ اس میچ میں ہندوستانی ٹیم 336 رنز سے جیت درج کرلی ہے۔ میچ میں انگلینڈ کو جیت کے لیے 608 رنز کا ہدف ملاتھا جس کا تعاقب کرتے ہوئے میزبان ٹیم کھیل کے پانچویں دن کے دوسرے سیشن میں آل آؤٹ ہو گئی۔

آکاش دیپ کا نام ریکارڈ بُکس میں درج

تیز گیند باز آکاش دیپ نے انگلینڈ کی سرزمین پر ٹیسٹ کرکٹ میں ایک تاریخی کارنامہ انجام دیتے ہوئے اپنا نام ریکارڈ بُکس میں درج کرا لیا ہے۔ انہوں نے چیـتن شرما کا 37 سال پرانا ریکارڈ توڑتے ہوئے انگلینڈ میں بھارت کی جانب سے میچ میں بہترین بولنگ کا اعزاز حاصل کر لیا۔ آکاش دیپ نے میچ میں مجموعی طور پر 10 وکٹیں لے کر 187 رنز دیے، جو کہ چیتن شرما کے 10/188 کے مقابلے میں بہتر ہے۔ پہلی اننگز میں انہوں نے 88 رنز دے کر 4 وکٹیں حاصل کیں، جب کہ دوسری اننگز میں شاندار بولنگ کا مظاہرہ کرتے ہوئے 99 رنز کے عوض 6 وکٹیں اپنے نام کیں—یہ ان کے کیریئر کی پہلی ٹیسٹ فائیو وکٹ ہال بھی رہی۔

بھارت کی 336 رنز سے شاندار فتح میں کلیدی کردار

بنگال کے اس تیز گیند باز نے اپنی رفتار، درستگی اور تسلسل سے انگلش بیٹنگ لائن کو چکناچور کر دیا، اور بھارت کی 336 رنز سے شاندار فتح میں کلیدی کردار ادا کیا۔ یہ جیت نہ صرف بھارت کی بولنگ برتری کا ثبوت بنی، بلکہ کپتان اور ٹیم کی تزویراتی مہارت (tactical superiority) کا بھی مظہر تھی۔

شاندار بولنگ نے سب کی توجہ اپنی جانب مبذول کرلی

میچ کی آخری اننگز میں بھارت کے نوجوان فاسٹ بولر آکاش دیپ کی شاندار بولنگ نے سب کی توجہ اپنی جانب مبذول کرلی ہے۔ انگلش بلے بازوں کیلئے آکاش دیپ کی تباہ کن بولنگ کے بعد صرف وکٹ پر ٹھہرنا ہی ایک ہدف بن گیا تھا۔ سابق انگلش کپتان ناصر حسین نے آکاش دیپ کی تعریف کرتے ہوئے کہا کہ یہ نوجوان گیندباز نہایت مہارت کا حامل ہے اور مسلسل دباؤ بناتا ہے۔ ناصر حسین نے اسکائی اسپورٹس پر کہا: میں سمجھتا ہوں کہ وہ ایک ہائی-اسکلڈ بولر ہے، جو ہر وقت آپ پر حملہ آور رہتا ہے۔ یہ صرف پچ میں پڑی دراڑوں کی بات نہیں ہے کہ اسے کامیابی ملی۔ وہ واقعی ایک شاندار بولر ہے۔

کپتان شبمن گل کی قیادت اور فیصلہ سازی کی بھی تعریف

ناصر حسین نے بھارتی کپتان شبمن گل کی قیادت اور فیصلہ سازی کی بھی تعریف کی، خاص طور پر آف اسپنر واشنگٹن سندر کو بروقت لانے پر، جنہوں نے انگلش کپتان بین اسٹوکس کو ایل بی ڈبلیو آؤٹ کیا جب وہ کچھ فارم میں آنا شروع ہو گئے تھے۔ ناصر حسین نے کہا: انگلینڈ نے کچھ حد تک محنت کی تھی۔ اسٹوکس، جو حالیہ وقت میں زیادہ کریز پر نہیں رہے، اپنی تال میں آ رہے تھے اور گیند نرم ہو چکی تھی۔ اس موقع پر واشنگٹن سندر کو لانا بہترین فیصلہ ثابت ہوا، اور گل نے اس سیشن میں تقریباً ہر چیز بالکل درست کی۔ حتیٰ کہ اس اینڈ سے آکاش دیپ کو بولنگ کروانا بھی، جو ہم میں سے اکثر نے شاید نہ کیا ہوتا۔

آکاش دیپ کی یہ کارکردگی نہ صرف ان کی بڑھتی ہوئی اہمیت کو اجاگر کرتی ہے، بلکہ یہ بھی ظاہر کرتی ہے کہ بھارت کے پاس ریڈ بال کرکٹ میں فاسٹ بولنگ کا ایک مضبوط اور باصلاحیت ذخیرہ موجود ہے۔ یہ کامیابی آکاش دیپ کے کیریئر کا یادگار لمحہ بن گئی ہے—اور ممکن ہے کہ آنے والے برسوں میں وہ بھارت کی فاسٹ بولنگ کا ایک بڑا ستون بن کر ابھریں۔

بھارت ایکسپریس اردو۔